Засгийн газрын хуралдаанаар 2021 он дуустал төрийн болон орон нутгийн өмчит байгууллагуудыг хэмнэлтийн горимд шилжүүлэх шийдвэр гаргасан. Тухайлбал, цар тахлын эсрэг ажиллаж байгаа байгууллагаас бусад улсын болон орон нутгийн өмчит, өмчийн оролцоотой бүх байгууллага, аж ахуйн нэгжийг он дуустал хэмнэлтийн горимд шилжүүлсэн. Энэ дагуу үр ашиггүй зардлыг бууруулж, зардлыг тэвчих замаар баталсан төсвөө 10-аас доошгүй хувь хэмнэх, шинээр автомашин, албан тасалгааны тавилга худалдаж авахгүй байх зэрэг тодорхой заалтыг тусгаж өгсөн билээ.

Гэвч “том” толгойтой нөхөд Ерөнхий сайдын гаргасан шийдвэрийг үл тоон, тансаг тавилга дунд суухгүй бол, сүүлийн үеийн хамгийн өндөр өртөгтэй автомашин хөлөглөхгүй бол бусдаас дутчих гээд байгаа бололтой. Нэг нэгнээсээ эд хөрөнгөөрөө дээр нь гарч, зиндаархах үзэгдэл ялангуяа төрийн өмчит байгууллагууд болоод аймгийн Засаг дарга нарт түгээмэл. Ялангуяа энэхүү тансаглалыг төрийн өмчит үйлдвэрийн газрууд тэргүүлнэ. Тухайлбал,

ТАНСАГ ТАВИЛГАД  ХАМГИЙН ИХ МӨНГӨ ЗАРЦУУЛСАН ТӨРИЙН ӨМЧИТ ГАЗРУУД:

-“ИНЕГ”-ын Үйлдвэрлэл үйлчилгээ- 440, 990, 000 төгрөг

-“МУИС”- 278, 648, 472 төгрөг

-“Эрдэнэт үйлдвэр” ТӨҮГ- 80,713, 876 төгрөг

-Улаанбаатар цахилгаан түгээх сүлжээ” ТӨХК -77, 826, 850 төгрөг

-“Дорнод бүсийн эрчим хүчний систем” ТӨХК- 52,834,450 төгрөг

-IV ДЦС” ТӨХК- 45, 756, 500 төгрөг

- “Барилгын хөгжлийн төв”- 41, 256, 964 төгрөг

-“Эрчим хүчний зохицуулах хороо” – 39,787, 000 төгрөг

-“Монгол газрын тос боловсруулах үйлдвэр” ТӨААНБ- 37,430,000

-“Нийслэлийн зураг төслийн хүрээлэн” ОНӨААТҮГ- 34, 675, 000 төгрөгийг тус тус зарцуулжээ.

ШИНЭ АВТОМАШИНД ХЭДЭН ТЭРБУМААР НЬ ХӨРӨНГӨ ЗАРСАН ТӨХК-ИУД:

-“Эрдэнэт” ТӨҮГ – 3, 089, 664, 198 төгрөг

-“Тавантолгой төмөр зам” ХХК- 1, 782, 295, 000 төгрөг

-“Монголросцветмет” ХХК- 225, 829, 100 төгрөг

-“Ус-Дү” ОНӨГ- 186, 709, 000 төгрөгөөр автомашин худалдан авчээ.

МОНГОЛБАНКНЫ ЗАХИРАЛ 300 САЯЫН ТЕНДЕРЭЭ ЦУЦАЛСАН ГЭСЭН Ч ФИТНЕСИЙН ТӨХӨӨРӨМЖҮҮДЭЭ НУУЦААР ЗӨӨЖ, ОРУУЛЖЭЭ

Тансаглалаараа толгой цохих дараагийн байгууллага нь Монголбанк. Ажилчдынхаа эрүүл мэндэд анхаарах нэрийдлээр 300 сая төгрөгөөр фитнесийн иж бүрэн тоног төхөөрөмж худалдан авах тендер зарласан нь ил болж,олон нийт шүүмжлээд эхлэнгүүт “За болилоо. Цагаа олоогүй худалдан авалт байлаа” хэмээн Монголбанкны захирал Б.Лхагвасүрэн мэдэгдэн, тендерээ цуцалснаа хэлж байв.  Гэвч аанай л бусдыг хуурч, ард түмнийг басамжилж сурсан тэд тендерээ цуцлаагүйгээр барахгүй саяхан фитнесийн тоног төхөөрөмжөө байгууллагадаа зөөж оруулсан тухай  мэдээлэл хэвлэлээр гарч эхэлсэн билээ. Ард түмэн чинь цагаан цаас шүү дээ гэдэг шиг Б.Лхагвасүрэн захирал ч тэгж ойлгодог бололтой.

ЗАСАГ ДАРГА Б.АРИУН-ЭРДЭНЭ, ИТХ-ЫН ДАРГА БАДРАА НАРЫН ЗИНДААРХАЛ  БА ТАНСАГЛАЛ

Цаашлаад аймгийн Засаг дарга нарын тансаглал үргэлжилнэ. Булган аймгийн Засаг дарга Б.Ариун-Эрдэнэ гэхэд л 2020 онд үйлдвэрлэсэн цоо шинэ, сүүлийн үеийн автомашин авахаар тендер зарлажээ. Тодруулбал, Аймгийн Засаг даргын албан хэрэгцээний автомашин худалдан авахаар Булган аймгийн орон нутгийн өмчийн газар тендер зарласан байдаг. Ингэхдээ 2020 онд үйлдвэрлэсэн “Ланд-200” маркийн автомашиныг 210,300,000 төгрөгөөр худалдан авахаар төлөвлөжээ.

-Өмнөговь аймгийн ИТХ-ын дарга Б.Бадраа 257 сая төгрөгөөр "LEXUS"570 маркийн автомашин авах тендер зарлажээ. Тендер зарлахдаа шинэ загварын, сүүлийн үеийнх гэж тусгайлан онцгойлон  зааж өгсөн байх жишээтэй.

У.Тэргэл