Рио Тинто болон Монгол Улсын Засгийн газрын хооронд удаан үргэлжилсэн маргааны эцэст талууд “Оюутолгойн Далд уурхайн бүтээн байгуулалт, Санхүүжилтийн төлөвлөгөө” буюу Дубайн гэрээг цуцалж, шинээр гэрээ байгуулахаар тохиролцсон талаар Японы “Nikkei Asia” сонин өчигдөр мэдээллээ.

Монгол Улсын Засгийн газрын хэрэг эрхлэх газрын дэд дарга Б.Солонгоо энэ талаар “Nikkei Asia” хэвлэлд “Хоёр тал 2015 оны хэлэлцээрийг цуцалж, шинээр байгуулахаар тохиролцсон. Үүний хүрээнд Рио Тинтогийн талаас зээлийн хүү болон менежментийн төлбөрийг бууруулахад бэлэн байгаагаа илэрхийлсэн” гэжээ.

Мөн Рио Тинтогийн ойрын эх сурвалж тус компани 2015 оны хэлэлцээрийг цуцалж, шинэ гэрээний заалтууд дээр дахин тохиролцохыг зорьж байгаа талаар мэдээлсэн байна.

Тэгвэл цаашид Дубайн гэрээг шинэчлэх асуудал Оюутолгойн далд уурхайн зардлын өсөлтийг хэрхэн зохицуулах асуудлын хүрээнд голчлон өрнөх бололтой.

Монгол Засгийн газраас томилогдсон Оюутолгой ХКК-ийн ТУЗ-ийн гишүүн Э.Баясгалан “Nikkei Asia” хэвлэлд “Дубайн гэрээнд далд уурхайн бүтээн байгуулалтын өртөг нэмэгдсэн тохиолдолд хэрхэн шийдвэрлэх зохицуулалт тусгагдаагүй. Тиймээс бид 2015 оны гэрээнд нэмэлт өөрчлөлт оруулах бус шинээр гэрээ байгуулахыг зорьж байна” гэх байр суурийг илэрхийлсэн байна.

Түүнчлэн Монгол Улсын Засгийн газар бямба гаригт Оюутолгой ХКК-ийн 2016-2018 оны хоорондох албан татварын ногдуулалт төлөлтийн байдалд хийсэн татварын хяналт шалгалтыг үндэслэн өнгөрөгч оны арванхоёрдугаар сард тогтоосон 649.4 тэрбум төгрөгийн татварын актын дагуух нэхэмжлэлийг үндэслэн Рио Тинто энэ оны хоёрдугаар сарын 25-ны өдөр эхний ээлжийн 229.8 тэрбум төгрөгийг Монгол Улсын төсөвт тушаасан талаар мэдэгдсэн. Мөн Рио Тинто цаашид нийт татварын актын үлдэгдэл болох 419.6 тэрбум төгрөгийг ойрын хугацаанд Монгол Улсад төлөх хүлээлттэй байгаа юм. Энэхүү үйл явдлын дараа Оюутолгойн хувь эзэмшигч талуудын дунд үүссэн маргаан тохиролцоонд хүрэх эерэг хүлээлт үүссэн.

Үүнээс өмнө Рио Тинто группийн гүйцэтгэх захирал Якоб Стаушольм өнгөрөгч лхагва гаригт “Оюутолгой бол Монголчууд болон Рио Тинтогийн хувьд хэн хэнд нь харилцан ашиг авчрах гайхалтай уурхай. Оюутолгой төсөлд яг одоо үүсээд байгаа асуудлын хүрээнд оролцогч талууд зөв хэлэлцээ өрнүүлж, зөв шийдлийг олох ёстой. Рио Тинтогийн Зэсийн группийн захирал Б.Болд аль хэдийн багаа бүрдүүлж, Монгол Улсын Засгийн газартай яриа хэлэлцээ хийх ажлыг эхлүүлээд байна. Хэрэв талууд аль аль нь шийдлийг олох хөшүүрэгтэй, хоорондоо зөв харилцаатай байвал бид шийдэлд хүрэх болно гэдэгт би итгэлтэй хэвээр байна” гэж мэдэгдээд байв.