Эх орончдын өдөр өчигдөр тохиож, улс эх орондоо ихийг хийж бүтээсэн эрхмүүдэд төрийн дээд одон медаль гадуулсан билээ. Энэ үеэр Төрийн дээд шагнал хүртсэн Монгол Улсын Гавьяат багш Д.Сэнгэдорж, Монгол Улсын Соёлын гавьяат зүтгэлтэн Л.Цэдэвдорж нартай уулзаж, тэдний сэтгэгдлийг хуваалцлаа. 

МУГБ Д.СЭНГЭДОРЖ: Миний бие Сүхбаатар аймгийн Асгат сумын уугуул, Бүрэнцогтын уурхайн “тавиул”, Мөнххаан сумын суугуул, Баруун-Урт сумын иргэн. Жанжны нэртэй, жанжны нэрэмжит аймгийн хөдөөгийн сумын ЕБС-ийн жирийн багшаас хичээлийн эрхлэгч, аймгийн сургалт, заах аргын кабинетын мэргэжилтэн, Судалгаа аргазүйн төвийн аргазүйч, Боловсрол, соёлын газрын дарга зэрэг албыг 37 жил тасралтгүй боловсролын салбарт зүтгэсэн. Үхэр жилийн босгон дээр Монгол Улсын Боловсролын гавьяат жилтан хэмээх нэр хүндтэй шагналыг хүртэж, Сүхбаатар аймагт ажиллаж, амьдарч байсан, Т.Банзрагч, Ш.Оюун, Д.Доржготов, Ш.Чулуунбор, Г.Наянтай, О.Сумьяагарав, Д. Лхагвасүрэн, Н. Оюунханд зэрэг гавьяат багш нарынхаа үргэлжлэл болсондоо баяртай байна. Дэмжиж тусалж ирсэн Сүхбаатар аймгийн боловсролын салбарынхандаа, гэр бүл, үр хүүхэд, анд нөхөд, алтан нутгийнхандаа мөн Н.Ганибал, Ж.Батсуурь нарын гишүүддээ баярлалаа. Сүхбаатар нутагт маань ухаант хүмүүс олноороо төрөн гарч, удамт хурдан хүлгүүд шигээ улс даяар дүүлэн давхих болтугай хэмээн ерөөе.

МУСГЗ Л.ЦЭДЭВСҮРЭН: 1961 оноос эхлэн соёл, урлагийн салбарт 60 жил ажиллалаа. Үлээвэр хөгжимчнөөр хөдөлмөрийн гараагаа эхлүүлээд Сүхбаатар аймгийн Соёлын ордонд орж, театр болтол нь ажиллаад, 2008 онд тэтгэвэртээ гарсан ч эргээд зөвлөх багшаар ажиллах болсон. Өнгөрсөн хугацаанд нийт 400 гаруй шавь бэлтгэн төрүүлснээс 100 гаруй нь морин хуурчин.

МУАЖ Ш.ЧИМЭДЦЭЕЭ: Морин хуурчин гэдэг дуучин хүний баруун гар байдаг. Дууны зарим хэсгийг дуучин өөрөө дуулж, зарим талыг нь хуурчин хийж өгдөг. Л.Цэдэвсүрэн гуай бол миний гарыг ганзаганд, хөлийг дөрөөнд хүргэж өгсөн багш минь. Энэ хүн өнөөдөр гавьяат болсонд би “нүгэлтэй” их баярлаж байна.

Р.Алтан