Нийслэлийг бүх нийтийн бэлэн байдлын зэрэгт шилжүүлж, уламжлалт Цагаан сарын баярыг хориглон байж, 12 хоногт хатуу хөл хорио тогтоон, өрх бүрийн нэг иргэнээс коронавирусний  шинжилгээ авсан. Ингэснээр халдварыг хумьж чадна хэмээн тооцож, 10 тэрбумыг зарцуулна хэмээн Шадар сайд мэдээлж байв.

Ерөнхий сайд Л.Оюун-Эрдэнэ ч энэ удаагийнх хамгийн сүүлчийн хатуу хөл хорио. Бусад цагт хэсэгчилж тогтоохоос бус ингэж нийтээр нь хатуу хөл хорихгүй хэмээсэн билээ. Иргэд ч дуулгавартай дагаж, дүрэм журмаа мөрдсөн.

Харин ард иргэдийн хүлээлт бол энэ цагаас хойш халдварын тоо эрс буурна. Байдал тогтворжино хэмээн найдаж байлаа. Харамсалтай нь, халдварын тохиолдлын тоо буурах нь бүү хэл харин ч эрс өссөөр, Тэр дундаа шинж тэмдэггүй, эх уурхай нь тодорхойгүй халдварын тохиолдол нэмэгдэж буй нь айдас төрүүлэх боллоо.

Шадар сайд С.Амарсайханы хэлж буйгаар бол, 12 хоногийн хугацаанд 411 мянган өрхийн нэг иргэнээс шинжилгээ авахаар төлөвлөсөн ч явуулын болон суурин цэгээр дамжуулан 558 мянган иргэнээс коронавирусний шинжилгээ авсан. Үр дүнд нь  халдварын 221 тохиолдлыг тогтоон, шинээр 36 голомтыг илрүүлж, тэдгээрийн ойрын хавьтлын 300 гаруй хүнийг тусгаарлаад байгаа талаарх мэдээллийг өгсөн.

Ингэж олноор нь, голомтоор нь илрүүлээд байхад сүүлийн хэдэн өдөрт халдварын тохиолдол 40-өөс буурахгүй болж, өчигдөр гэхэд л бүр 77-д хүрлээ. Үүнээс харахад, “Нэг хаалга-нэг шинжилгээ” үр дүнгээ өгсөн үү гэдэг нь эргэлзээ төрүүлж байна. Төсвийн өчнөөн тэрбум төгрөг зарлагадан байж шинжилгээ хийх хэрэг байв уу. Цаашид ч тохиолдлын тоо нэмэгдсээр, эмчилсээр, тусгаарласаар. Амьдралын ийм хэмнэлд шилжчихэв үү.

Ямартай ч, ерөнхийдөө халдварыг хумьж чадлаа гэсэн УОК-ынхны үг бодит амьдралаас хол зөрүүтэй нь илт байна.

У.Тэргэл