Коронавирусний халдварын тоо өдрөөс өдөрт олноор нэмэгдэж, өдгөө иргэд УОК, ЭМЯ бус өөрсдөдөө найдах цаг ирлээ. Хайртай бүхнээ хамгаалъя гэвэл гэртээ байж, олон нийтийн газраар явахгүй, ариун цэврээ сахиж,  амны хаалтаа байнга зүүх зэрэг наад захын дэглэмийг сахих зайлшгүй шаардлагатай болж байна. Энэ бүхэн юунаас үүдэлтэй вэ. Олон хоногийн хатуу хөл хорио тогтоон байж халдварыг хумина гэсэн албан тушаалтнуудын амлалт хаана байна вэ. Байдал дээрдсэнгүй улам дордлоо.  

Шинээр томилогдоод удаагүй байгаа Шадар сайд С.Амарсайханы тэргүүлсэн Улсын онцгой комисс, шинэ сайдтай болсон Эрүүл мэндийн яам үнэхээр хариуцлагагүй ажиллаж, гаргасан шийдвэр нь “бай”-гаа онохгүй байгааг сүүлийн өдрүүдэд гарч буй халдварын олон тохиолдлуудаас харж болохоор байна. Харин тэдний дэргэд Нийслэлийн онцгой комисс нэг алхмаар түрүүнд явна. Тэд тооцоо судалгаатай мэдээллийг иргэдэд цаг тухайд нь өгч, нээлттэй ажиллаж буйд иргэд талархалтай хандаж байна. Аливаа асуудлыг ам гарч бус ажлын үр дүнгээр тооцох учиртайг ч харуулж байна.

Иргэд өдгөө хэн нь зөв шийдвэр гаргаж, сэтгэл гарган зүтгэж буйг төвөггүй ойлгодог болсон цаг. Тиймдээ ч сүүлийн өдрүүдэд УОК-ын дарга, Эрүүл мэндийн сайдыг огцрохыг шаардаж эхэлсэн. Тэглээ гээд асуудлыг шийдчихгүй ч ажилд нь дүн тавьж буйн тод илрэл юм.

У.Тэргэл