Монгол Улсын Ерөнхий сайд Л.Оюун-Эрдэнэ өнөөдөр буюу  Эмэгтэйчүүдийн эрхийг хамгаалах өдөр ШШГЕГ-ын харьяа Цагдан хорих 401 дүгээр ангийн харьяа эмнэлэгт ажиллаж байна. Учир нь, С.Зориг агсны амь насыг хөнөөсөн хэрэгт буруутгагдан ял эдэлж буй Т.Чимгээ тус хорих ангийн эмнэлэгт хэвтэн эмчлүүлж байгаа юм.

Ерөнхий сайд Л.Оюун-Эрдэнэ энэ талаар "Засгийн газар өглөө ээлжит бусаар хуралдаж, ял эдэлж буй Т.Чимгээтэй холбоотойгоор эмэгтэй хүний эрхийг зөрчсөнийг сонсоод ирж, уулзлаа. Шүүн таслах үйл ажиллагаанд хүний эрх, хууль зөрчсөн зүйл, ТЕГ, ЦЕГ, АТГ, ШШГЕГ–тай холбоотой асуудал гарч ирнэ. Нууцын зэрэгтэй асуудал болохоор бүх зүйлийг ярих боломжгүй. Өнгөрсөн хугацаанд олон нийтэд ил болсон зарим зүйлийг тодруулах, хэвлэлийн өмнө нягталж ярих үүрэг байна гэж үзсэн. Зарим шаардлагатай мэдээллийг нууцаас гаргахаар болсон. Шүүн таслах үйл явц дунд олон зүйл болсон байна. Хорих ангид ял эдэлж байгаа хүн Т.Чимгээ рүү мессеж бичиж, дарамталсан, мөн цогцос гэрт нь аваачсан явдал байсан. Хуулийн нэр бүхий хүмүүс хувийн харилцаа тогтоож, мансууруулах бодис тарьсан үед цээжийг нь ил гаргаад, зургийг нь гэр бүлийнх хүнд нь явуулсан байна. Харамсалтай нь, Т.Чимгээгийн охин н.Өнөрцэцэг 2016 оны наймдугаар сард амиа алдсаныг сэргээн шалгах хэрэгтэй гэж үзсэн. Шүүхийн гэм буруугийн асуудлыг бус шүүн таслах үйл ажиллагаа зөв явсан эсэхийг ярьж байна. Эмэгтэйчүүдийн эрхийг хамгаалах энэ өдөр хилсээр, эрүүдэн шүүснээс хэрэг хүлээсэн байж болзошгүй " гэв.

Б.Баасанцогт гэж хүн хэрэг төлөвлөдөг юм байна

Ерөнхий сайд “Сүүлийн үед Б.Баасанцогт гэх хүний талаар ярих болсон. Энэ хүн хэрэг төлөвлөдөг, Х.Идэр, З.Болдбаатар гэдэг шүүгчид нэр бүхий прокуроруудтай ажилладаг юм байна. Хэдэн жилийн өмнө бид "хонгил" нураах тухай тэмцлийг эрчимтэй хийж байсан. Гэтэл өдгөө цагт дахиад захиалгаар хэрэг ялладаг болж байна уу гэдэг асуудал гарлаа. Энэ хэрэгт ҮАБЗ-ийн Ерөнхий нарийн бичгийн дарга А.Гансүх гүнзгий оролцдог байж болзошгүй. Цаашид тэр хүнд энэ албан тушаалаа хаших ёс зүй байх уу гэдгийг ҮАБЗ-ийн нэг гишүүний хувьд хөндөнө. УИХ-ын чуулган эхлэх үед энэ асуудлыг хөндөж, тавина. Бичлэгийн цаана зөвхөн архидалт болоогүй. Өмгөөлөгч шүүгчид нөлөөлөх боломжгүй ч нөлөөлсныг нь урьдчилсан байдлаар тогтоосон. Энэ бол зүгээр нэг архидалт байгаагүй. Шүүгчид "Ариг" банкнаас шан харамж, авлига авсан байж болзошгүй нөхцөл байдал үүний цаана үүссэн" гэв.

Т.Чимгээ харин энэ үеэр “Намайг 2015 оны наймдугаар сарын 31-нд хорьсон. Маш хүнд байсан. Ариун цэврийн хэрэглэл байхгүй, агааржуулалтгүй зоорины өрөөнд есөн сар хорьсон. Цагдан хорих 407 дугаар ангид 2017 оны тавдугаар сард шилжиж ирсэн. Нөхцөл байдал ялгаагүй байсан. Ингээд цагдан хорих 401 дүгээр анги руу шилжүүлсэн. Намайг энд ирснээс хойш нэг жилийн дараа миний том охин нас барсан. Миний амьдрал, ар гэр орвонгоороо эргэлээ. Энэ хэргийг дахин шалгуулах хүсэлтэй байна” хэмээн Ерөнхий сайдад уламжиллаа.