Узбекистаны нийслэл Ташкент хотод жүдо бөхийн их дуулга тэмцээн гурван өдөр болж өндөрлөлөө. Энэ тэмцээний үеэр IJF буюу ОУЖБХ-ын удирдах зөвлөлийн хурал болоход гавьяат тамирчин Хишигбатын Эрдэнэт-Одыг тус холбооны удирдах зөвлөлийн гишүүнээр сонгожээ.

Тэрбээр энэхүү нэр хүндтэй холбооны өндөр албан тушаалд томилогдож буй анхны монгол хүн болж байна. ОУЖБХ-ны удирдах зөвлөлд нийт 17 хүн байдаг бөгөөд жүдо бөхийг хөгжүүлэх зөвлөлд Японы олимпийн хорооны ерөнхийлөгч, Жүдо бөхийн холбооны тэргүүн Ясухиро Ямашита болон Кодокан жүдо бөхийн их сургуулийн тэргүүн Харуки Уимуратай хамт ажиллах юм.

Х.Эрдэнэт-Од нь жүдо бөхийн ДАШТ-ий хүрэл, Азийн наадмын алт, хүрэл, Азийн АШТ-ий хошой алт, дөрвөн мөнгө, нэг хүрэл медальтай шилдэг жүдоч. 2008 онд их спортоос зодог тайлж, эмэгтэйчүүдийн шигшээ багийг удирдах хугацаанд олимпийн наадмын мөнгө, ДАШТ-ий алт, мөнгө, хүрэл медальтнууд төрөн гарсан билээ.

Б.Жаргал