Улсын ерөнхий прокурорын орлогч асан Г.Эрдэнэбат, ТЕГ-ын дарга асан Б.Хурц нарт холбогдох бусдыг эрүүдэн шүүсэн эсэхийг хэлэлцэх шүүх хуралдааныг гуравдугаар 17-нд буюу ирэх лхагва гарагт товлосон байна.

Төв аймгийн сум, дундын Эрүүгийн хэргийн анхан шатны шүүх өнгөрсөн оны долоодугаар сард уг хэргийг хэлэлцээд Б.Хурц, Ж.Мөнхгал, С.Баяр, Г.Эрдэнэбат нарт гурван жилийн хорих ял оноож, ялыг нээлттэй хорих ангид эдлүүлэхээр, харин О.Бямбажав, Ү.Отгонбаярт хоёр, Э.Өлзийбаярт нэг жилийн хорих ял тус тус оноож, мөрдөгч О.Бархасбадь, С.Эрдэнэбат нарыг цагаатгасан билээ.

Харин Б.Хурц, Г.Эрдэнэбат нарын өмгөөлөгчид давж заалдсанаар хэргийг анхан шатны шүүхэд буцааж, тус шүүхийн шүүгчийн шийдвэрээр яллагдагчдыг батлан даалтад гаргасан билээ.

С.Зориг агсны амийг хэрцгийгээр хөнөөсөн уг хэргийн холбогдогчидтой холбоотой асуудал төр, засгийн хэмжээнд хүрсэн. Тиймдээ ч Б.Хурц, Г.Эрдэнэбат нарыг бусдыг эрүүдэн шүүсэн хэрэгт яллах нь тодорхой хэмээн хуульчид хэлж байна.

У.Тэргэл