Үндсэн хуулийн Цэц есөн гишүүнтэй. Гэвч тэдний хоёрынх нь бүрэн эрхийн хугацаа дуусаад нэг жил гаруй болж байна. Үндсэн хуулийн Цэцийн тухай хуульд “Үндсэн хуулийн Цэц есөн гишүүнээс бүрдэнэ. Тэдгээрийн гурвыг УИХ, гурвыг Монгол Улсын Ерөнхийлөгч, гурвыг нь Улсын Дээд шүүх санал болгосноор УИХ зургаан жилийн хугацаагаар томилно. “Мөн Цэцийн гишүүнээр томилох хүнийг УИХ-д санал болгохдоо УИХ-ын дарга зохих байнгын хороодын санал, дүгнэлтийг үндэслэн захирамж, Ерөнхийлөгч захирамж, Улсын Дээд шүүх гишүүдийнхээ олонхын саналыг үндэслэн зохих шийдвэр гаргана” хэмээн нарийвчлан заасан байдаг.

Гэтэл Үндсэн хуулийн Цэцийн гишүүдийн хоёрынх нь буюу Ш.Цогтоо, Д.Солонго нарын бүрэн эрхийн хугацаа 2019 оны арванхоёрдугаар сарын 26-ны өдөр дуусгавар болсон билээ. Үндсэн хуулийн Цэцийн тухай хуулийн гуравдугаар зүйлийг 4-т “....Цэцийн гишүүдийг нөхөн томилохдоо орон гарсан гишүүнийг урьд томилох санал болгосон эрх бүхий байгууллага, албан тушаалтан саналаа 14 хоногийн дотор гаргах бөгөөд түүнийг УИХ 30 хоногийн дотор шийдвэрлэнэ” хэмээсэн.

Хуульдаа 30 хоногт гээд заачихсан байхад нэг жил гаруйн хугацаанд гацааж байж саяхан л сонгон шалгаруулалтыг зарласан юм.

Ийнхүү Цэцийн дараагийн гишүүнд  олон нэр дэвшигчийн нэрс дуулдаж байна.

Тухайлбал, Улсын дээд шүүхийн шүүгч О.Зандраа,  Шүүхийн ерөнхий зөвлөлийн гишүүн асан Д.Эрдэнэчулуун, МУИС-ийн Хууль зүйн сургуулийн захирал Ж.Эрдэнэбулган, Монголын Өмгөөлөгчийн холбооны ерөнхийлөгч асан Б.Ганбаатар, шүүгч П.Амаржаргал, Хууль зүйн ухааны доктор, профессор Д.Зүмбэрэллхам, УИХ-ын гишүүн асан Д.Лүндээжанцан нарын нэрс яригдаж буй. 

Эдгээрээс олонхын санал авсан нэр дэвшигчдийг Улсын Дээд шүүх олон нийтэд албан ёсоор мэдээлэх учиртай юм.

У.Тэргэл