Токиогийн олимп, Паралимпын зуны наадмыг коронавирусний цар тахлын улмаас олон улсын үзэгчгүйгээр зохион байгуулахаар шийдвэрлэжээ. Энэ талаар Олон улсын олимпын хорооны тэргүүн Томас Бах “Зохион байгуулагчдын эн тэргүүний зорилт бол наадамд оролцох тамирчдын болон Японы ард түмний аюулгүй байдлыг сайтар хангах явдал юм” хэмээн мэдэгдээд байгаа юм.
Энэ ч үүднээсээ Японы Олимпын хороо наадмын тасалбар худалдан авсан гадаадын үзэгчдэд төлбөрийг нь буцаан олгохоо мэдэгдсэн байна. Мөн дотооддоо явуулсан сугалаагаар 4.45 сая орчим тасалбарыг худалдаалсан боловч өнгөрсөн онд 810 мянга гаруй хүн тасалбараа буцаах хүсэлт гаргажээ. Мөн хилийн чанадад нэг сая орчим тасалбарыг зарсан гэж үзэж байгаа аж.
Цар тахлын улмаас нэг жилээр хойшлуулсан “Токио-2020” Олимпын бамбарын буухиа ирэх долоо хоногийн пүрэв гарагаас Фүкүшима мужаас эхлэх юм. Наадмын үеэр тамирчдыг коронавирусний шинжилгээнд өдөр бүр хамруулахаар төлөвлөсөн байна.