Монгол Улсын Дээд шүүхийн шүүгчдийн өнөөдрийн хуралдаанаар Үндсэн хуулийн Цэцийн хоёр гишүүнийг сонгоно. Тодруулбал, Үндсэн хуулийн Цэцийн гишүүнээр ажиллаж байсан Ш.Цогтоо, Д.Солонго нарын бүрэн эрхийн хугацаа 2019 оны арванхоёрдугаар сарын 26-ны өдөр дуусгавар болсон юм.
Харин орных нь хоёр хүнийг 30 хоногийн дотор томилох учиртай ч Улсын Дээд шүүх нэг жил гаруйн хугацаанд ямар ч ажиллагаа хийгээгүй юм. Ийнхүү ихээхэн шүүмжлэл дагуулсны эцэст сонгон шалгаруулалтыг зарласнаар 18 хуульч нэрээ дэвшүүлж, нэг нь нэрээ татсанаар 17 хүн тунаж үлдсэн билээ.
Гэтэл өнөөдөр 17 нэр дэвшигчээс Д.Зүмбэрэллхам нэрээ татсанаар 16 хуульч Үндсэн хуулийн Цэцийн хоёр орон тоонд өрсөлдөхөөр болж байна. Эдгээрээс хамгийн өндөр санал авсан хоёр эрхмийг УИХ-д өргөн мэдүүлэх зохицуулалттай.
Эх сурвалжийн мэдээлж буйгаар, хуульч Т.Уранцэцэг, Д.Эрдэнэчулуун, Д.Баяндүүрэн нарын дунд гол өрсөлдөөн болж буй гэх. Эдгээрээс магадлалтай нь, Д.Баяндүүрэнг хэмээж байна. Түүнийг Цэцийн гишүүнд Монгол Улсын Ерөнхийлөгч зүтгүүлж буй гэх бөгөөд тэрбээр Сонгуулийн ерөнхий хорооны ажлын албаны даргаар ажиллаж байсан, эрх зүйч мэргэжилтэй, хууль зүйн ухааны магистр цолтой юм байна.
У.Тэргэл
