Үндсэн хуулийн Цэцтэй холбоотой үйл явдлууд сүүлийн өдрүүдийн анхаарал татсан сэдэв болоод байна. Цэцийн сул орон тоон дахь өрсөлдөөн, Ерөнхийлөгч Х.Баттулга дахин нэр дэвших эрхтэй эсэх маргаан, Цэцийн гишүүдийн хоорондын талцал хагарал гээд үргэлжилнэ.
Улсын Дээд шүүхээс нэрийг нь дэвшүүлсэн Ж.Эрдэнэбулганыг Хууль зүйн байнгын хорооны өчигдрийн хуралдаанаар гишүүдийн олонхын саналаар дэмжиж, УИХ-д өргөн мэдүүлэхээр болсон юм.
Энэ дагуу өнөөдрийн буюу гуравдугаар сарын 25-ны өдрийн УИХ-ын чуулганаар Ж.Эрдэнэбулганыг Цэцийн гишүүнд томилох учиртай. Гэтэл эл томилгоог эсэргүүцэн УИХ-ын чуулганыг хуралдуулгүйн тулд жагсаал цуглаан зохион байгуулахаар төлөвлөсөн гэдгийг эх сурвалж хэлж байна.
Хэвлэл мэдээллийн хэрэгслээр ч “Ерөнхийлөгчийн Тамгын газрын дэд дарга Г.Байгалмаа АН-ын Хэрэг эрхлэх газрын дарга П.Нүрзэдэд хандаж, УИХ-ын өнөөдрийн хуралдааны үеэр Төрийн ордны гадна МоАХ-ны гишүүд цаашлаад гишүүд дэмжигчдийг цуглуулах чиглэл өгсөн” гэх мэдээллүүд гарч эхэлсэн.
Ямартай ч, Үндсэн хуулийн Цэцийн гишүүд Ерөнхийлөгчийн тухай хуульд оруулсан зүйл заалттай холбоотой маргааныг хэлэлцэх эсэхийг эцэслэх байтал Үндсэн хуулийн Ц-ийн гишүүн Д.Солонго маргаан үүсгэсэн нь гэнэтийн явдал болж, Цэцийн бусад гишүүн маргаан үүсгэх үндэслэл болохгүй хэмээсэн талцал хуваагдал үүнээс үүдэлтэй билээ. Тодруулбал, Д.Солонгын гаргасан шийдвэрийг Цэцийн гишүүн Б.Буяндэлгэр үл зөвшөөрч бичгээр санал гаргасан тул Д.Солонгын шийдвэр зөв эсэхийг гурван гишүүний бүрэлдэхүүнтэйгээр, тодруулбал, Ц.Нанзаддорж, Ш.Цогтоо, Д.Одбаяр нар баасан гарагт хэлэлцээд, шийдвэр гаргаж чадалгүй, зарим нэг нь зугтаж алга болсон талаар бид өмнө мэдээлсэн билээ.
Хамгийн сүүлийн мэдээллээр бол, Үндсэн хуулийн Цэцийн гишүүн Д.Солонгыг Хөх хотод суух консулаар томилох тохироо хийсэн гэх яриа хөвөрч байна.
Тэрбээр ирэх долоо хоногт ажлаасаа чөлөөлөгдөх бөгөөд дараагийн албан тушаалд очихын тулд Цэцийн гишүүний бүрэн эрхээ сүүлчийн удаа ашиглан хууль зөрчин “нүүдэл” хийсэн гэх хардлага байна.
У.Тэргэл
Сэтгэгдэл (10)