Улсын ерөнхий прокурорын санаачилгаар хууль, хяналтын байгууллагын  нэр бүхий ажилтнуудтай холбоотой гомдол, мэдээлэл, хэргийг хянаж, шуурхай шалгаж, шийдвэрлүүлэх Ажлын хэсэг байгуулаад нэг сар орчим болж байна. Шударга бустай тэмцэх УЕП-ын санаачилга бодит ажил хэрэг болж, түрүүчээсээ олны анхаарал татаад буй хэргүүдэд анхаарлаа хандуулж эхэлсэн билээ. Харин эл хэрэгт Нийслэлийн прокурорын газрын орлогч прокурор Ц.Насанбатыг албан тушаалаас нь чөлөөлж, шалгуулах хүсэлт, шаардлагыг УИХ-ын хэсэг гишүүн, хуульч, өмгөөлөгч Д.Батсүх, З.Сүхбаатар нарын олон хүн тавиад байгаа.

Харин Улсын Ерөнхий прокурор Б.Жаргалсайхан одоогоор тодорхой хариулт өгөхгүй “гүрийж” буй нь Монгол Улсын Ерөнхийлөгчтэй холбоотой гэх. Учир нь, Ц.Насанбат прокурор  Ерөнхийлөгчийн “төмөр зам”-ын гэх дуулиант хэргийг хэрэгсэхгүй болгосон, цаашлаад “Ариг банк”-ны, “Алтандорнод Монгол”-ын Т.Ганболдын Улсын ерөнхий прокурор асан Д.Дорлигжавт өгсөн дөрвөн сая ам долларын, хамгийн сүүлд УИХ-ын гишүүн Сү.Батболдтой холбоотой хэрэгт “хөл, гараа дүрсэн” нэгэн.

Тодруулбал, гадаад улс оронд Монголын иргэнээ шалгуулахаар  бичиг цаас бариад гүйгээд байгаа Ц.Насанбат прокурорыг УИХ-ын гишүүн Сү.Батболдын хуульчид “Ц.Насанбат прокурор тодорхой хууль тогтоомжуудыг зөрчиж улмаар олон нийтэд гүтгэлэг бүхий мэдээллийг санаатайгаар түгээсэн” гэдгийг баримттайгаар мэдэгдсэн.

Мөн  улстөрчдийг хуулийн байгууллагаар оруулах схем боловсруулсан өмгөөлөгч Б.Баасанцогттой Ц.Насанбат прокурорын уулзаж буй гэрэл зураг саяхан ил болсон нь тэд гүнзгий холбоо, сүлбээтэйг илтгэнэ.

 “Хонгил”-ын шүүгчдийн хамсаатан Ц.Насанбат “хонгил”-ын прокурор байжээ гэдгийг хүлээн зөвшөөрч болохоор байна. Гэвч тэрбээр өнөөдрийг хүртэл эрх дураараа явна.  Харин түүнд холбогдох ноцтой олон үйлдлийг шалгаж, зохих ял шийтгэлийг нь оноох, эс бөгөөс нэрийг нь цэвэрлэх боломж Улсын ерөнхий прокурор Б.Жаргалсайхан танд байна. Учир нь, ажил үүргээ шударгаар гүйцэтгэж байгаа олон зуун  прокурор, прокурорын байгууллагын нэр хүнд Ц.Насанбаттай хамт “шалдаа” унаж буй учраас тэр юм.

У.Тэргэл