Сүүлийн үед ихээхэн хэл амтай байгаа прокурорын байгууллагад салхи сэвэлзэж эхлэх бололтой. Учир нь, үнэнд гүйцэгдэнэ гэгчээр элдэв дуулианд нэр нь холбогдоод байгаа нэр бүхий прокурорууд түүний удирдлагын албан тушаалыг түдгэлзүүлж, заримынх нь албан үүргийг өөрчилсөн байна. Тодруулбал,

Нийслэлийн ерөнхий прокурор Ш.Нямдорж, орлогч прокурор Ц.Насанбат нарыг албан тушаалаас нь чөлөөлж, тэдний оронд үүрэг гүйцэтгэгчдийг томилсон байна. Тухайлбал, Нийслэлийн ерөнхий прокурор Ш.Нямдоржийг албан тушаалыг бууруулж, Баянзүрх дүүргийн Прокурорын газарт хяналт, шалгалт хариуцсан ахлах прокуророор томилсон бол “хэргийн эзэн хэнгэргийн дохиур” болох орлогч прокурор Ц.Насанбатыг албан тушаалаас нь түдгэлзүүлж, чөлөөлжээ. Тэдгээрийн оронд Нийслэлийн ерөнхий прокурорын үүрэг гүйцэтгэгчээр Д.Баянжаргал, орлогч прокуророор Ч.Энхжаргал нарыг томилсон байна. 

Нийслэлийн прокурорын газрын удирдлагуудыг ийнхүү өөрчилсөн нь нэр бүхий шүүгчид, хуулийн байгууллагын ажилтнуудын бичлэг задарсан, АН-ын дарга С.Эрдэнийг яллагдагчаар татсан, Улсын ерөнхий прокурор, хууль цаазын итгэмжит төлөөлөгч Б.Жаргалсайханы нийгэмд дуулиан, шуугиан тарьсан, хэвлэл мэдээлэлд гарсан, олны анхаарлыг татсан хэргүүдийг татан шалгах ажлын хэсэг байгуулсантай холбоотой хэмээн мэдээлж байна. Мөн Ц.Насанбат прокурорыг албан тушаалаас нь түдгэлзүүлсэн нь түүнийг шалгаж эхлэх нь гэсэн найдварыг төрүүлж байгаа юм.

Ямартай ч, нийгэмд байтугай хуулийн салбартаа ч хаалттай байдаг прокурорын байгууллагад ийнхүү шударга үнэний салхи сэвэлзэж эхэлсэн бололтой. Цаашид яаж өрнөхийг харах, хүлээх л үлдлээ.

У.Тэргэл