Нийслэлийн нүүр царай болсон, жуулчдын үйлчлүүлэх дуртай 100 жилийн түүхтэй Улсын их дэлгүүр өнгөрсөн оны зургаадугаар сард шатаж, ихээхэн хэмжээний хохирол амссан билээ. Тус дэлгүүрт худалдаа, үйлчилгээ эрхэлдэг 200 орчим хүний эд хөрөнгө сүйдэж, барилга байшин сүйдсэн эл ноцтой хэрэгт буруутай этгээдүүдийг удахгүй шүүхээр болсон байна. Учир нь, эл хэрэгт прокуророос яллах дүгнэлт үйлдэн шүүхэд шилжүүлжээ.
Хамгийн ноцтой нь,”Улсын их дэлгүүр” ХК-тай засвар үйлчилгээ хийх гэрээ байгуулсан компани нь тусгай зөвшөөрөлгүйн дээр нэр бүхий иргэдтэй аман гэрээ байгуулан зургаадугаар давхрын хар цаасан дээврийг солиулах ажлыг хийлгэхээр тохирсон аж. Мэргэжлийн бус хүмүүс учраас гал алдаж, бусдад их хэмжээний буюу урьдчилсан байдлаар, 25 тэрбумын ноцтой хохирол учруулсан байна. Эл хэргийг шүүх анхан шатны хуралдааны товыг Чингэлтэй дүүргийн шүүх удахгүй зарлах юм байна
У.Тэргэл