Ял шийтгүүлж явсан тагнуулч асан Д.Цогтбаатарыг хууль зөрчин УЕПГ-ын Хэрэг эрхлэх газрын даргаар томилсон нь Төрийн албаны зөвлөлийн дүгнэлтээр тодорхой болов. Тодруулбал, өмгөөлөгч Г.Нацагдорж тагнулч асан Д.Цогтбаатар прокурорын байгууллагад орохдоо Төрийн албаны хууль зөрчиж орсныг дурдаад Төрийн албаны зөвлөлд хандсан байдаг.

Тэрбээр “Төрийн жинхэнэ албанд гэмт хэрэг үйлдэж, шүүхээс ял сонсч байсан иргэн томилогдох эрхгүй. Гэтэл Улсын Ерөнхий прокурорын газрын Хэрэг эрхлэх газрын дарга Д.Цогтбаатар нь төрийн нууц задруулсан хэргээр шүүхээс ял сонсож, биеэр эдлээд суллагдсан. хэрэг эрхлэх газрын даргаар ажиллах туршлагагүй учир уг томилгоо хуульд нийцэж байгаа эсэхийг шалгаж өгнө үү” гэсэн хүсэлт гаргасан юм. Уг хүсэлтийг Төрийн албаны зөвлөлөөс шалгаад Улсын Ерөнхий прокурор Б.Жаргалсайханд дараах дүгнэлтийг хүргүүлсэн байна.

Төрийн албаны зөвлөлөөс “Төрийн албаны тухай хуулийн 22 дугаар зүйлийн 22.1.3 дахь заалтад төрийн жинхэнэ албан тушаалд Эрүүгийн хуульд заасан авлига, албан тушаалын гэмт хэрэг үйлдэж, шүүхээс ял шийтгүүлж байгаагүй иргэн ажиллах нийтлэг шаардлагыг, мөн хуулийн 23 дугаар зүйлийн 2”.2.1 дэх заалтад зааснаар тэргүүн түшмэлийн ангилалд хамаарах албан тушаалд томилогдох бол төрийн албанд 16-аас доошгүй, үүнээс эрхэлсэн түшмэлийн албан тушаалд 8-аас доошгүй жил ажилласан байх шаардлагыг тус тус хуульчилсан. Гэтэл Д.Цогтбаатар нь 1998 оноос хойш Тагнуулын Ерөнхий газарт төрийн тусгай албан хаагчаар, 2006-2014 он хүртэл хэлтэс, газрын даргын албан тушаал хашиж байгаад 2014 онд Эрүүгийн хуулийн 87 дугаар зүйлийн 87.1 дэх хэсэг, 149 дүгээр зүйлийн 149.2 дахь хэсэгт заасан гэмт хэрэгт тус тус шийтгүүлсэн байна. Иймд Д.Цогтбаатарт холбогдох асуудлыг нягтлан шалгаж, хуульд нийцүүлэн шийдвэрлүүлэхээр шилжүүлэв” гэжээ.

Эндээс үзвэл тагнуулч асан Д.Цогтбаатар хууль зөрчиж прокурорын байгууллагын Хэрэг эрхлах газрын даргаар томилогдсоноос гадна Ерөнхий прокурор Д.Жаргалсайхан мэдсэн ч мэдээгүй юм шиг өнгөрөөдөг байж таарах нь. Хуулийг сахиулах үүрэгтэй хүн өөрөө зөрчин байж түүнийг дэргэдээ байлгахын цаад учиг юу вэ? 

А.Сүх