Улсын онцгой комиссын даргын 2021 оны дөрөвдүгээр сарын 2-ны өдрийн 31 дүгээр тушаалаар “Тусгаарлан ажиглах үйл ажиллагааг зохицуулах түр журам”, “Гэр/амрах байр/ийн тусгаарлалт, ажиглалтын үйл ажиллагааг зохицуулах түр журам”-д өөрчлөлт оруулжээ. Энэ талаар Улсын Онцгой комиссын шуурхай штбасын дарга Ц.Ганзориг мэдээлэл хийлээ.
Тэрбээр "Өмнө нь гадаад улсаас ирж байгаа, коронавирусний вакцинд хамрагдаагүй иргэдийг тусгаарлан ажиглах байранд 10 хоног тусгаарладаг байсан. Харин үүнийг шинэ журмаар долоо хоног болгосон. Мөн коронавирусний халдварын тохиолдлын ойрын хавьтлыг өөрийн хүсэлтээр тусгаарлан ажиглах байрны төлбөрийг төлүүлж, 7 хоног тусгаарлах шийдвэр гаргасан.
Харин батлагдсан тохиолдлыг хэвтүүлэн эмчлэх, тусламж үйлчилгээ үзүүлэх, эмч эмнэлгийн ажилчдыг 14 хоног тусгаарладаг байсныг 7 хоног болгон өөрчилжээ. Гадаадаас ирж буй агаарын хөлөгийн багийнханы тусгаарлах хугацаа 14 хоног байсныг мөн 7 хоног болгосон байна.
Мөн Монгол Улсад суугаа дипломат төлөөлөгчийн газрын ажилчид болон тэдний гэр бүлийг тухайн улсын дипломат төлөөлөгчийн газрын байранд тусгаарлаж болох зохицуулалтыг оруулжээ.
Тусгаарлан ажиглах байранд тусгаарлагдсан иргэнд pcr шинжилгээ авах ажлыг гурав болон зургаадахь хоногт нийслэлд ХӨСҮТ-ийн шуурхай хариу арга хэмжээний баг, орон нутагт эрүүл мэндийн байгууллага зохион байгуулна.
Коронавирусний эсрэг вакцины бүрэн тун авснаас хойш 14 хоногийн хугацаа өнгөрсөн болон халдвар аваад эдгэрсэнийг тусгаарлан ажиглах байранд тусгаарлахгүй, мөн PCR шинжилгээ авахгүй. Тиймээс иргэд эдгээр нотломжоо үнэн зөв мэдээлэх хэрэгтэй" гэв.
Б.Баатар
