Улсын онцгой комиссын даргын 2021 оны дөрөвдүгээр сарын 2-ны өдрийн 31 дүгээр тушаалаар “Тусгаарлан ажиглах үйл ажиллагааг зохицуулах түр журам”, “Гэр/амрах байр/ийн тусгаарлалт, ажиглалтын үйл ажиллагааг зохицуулах түр журам”-д өөрчлөлт оруулжээ. Тус журмаар коронавирусний халдварын тохиолдлын ойрын хавьтлыг өөрийнх нь хүсэлтээр тусгаарлан ажиглах байрны төлбөрийг төлүүлж, 7 хоног тусгаарлах шийдвэр гаргасан байна. 

Тэгэхээр халдварын тохиолдлын ойрын хавьтал болсон хүн өөрөө хүсвэл тусгаарлан ажиглах байрны төлбөрийг төлснөөр 7 хоног тусгаарлагдахаар болж байгаа аж. Үнэхээр энэ журам амьдралд хэрэгжих үү. Коронавирусний цар тахалтай нүүр тулж, хэдэнтэй хөл хорионд орсон монголчуудын амьдрал ямар байгаа билээ. Хоногийн хоолоо арай ядан залгуулж буй иргэд "Халдвартай хүний ойрын хавьтал болчихлоо. Төлбөр мөнгийг нь төлөөд тусгаарлагдая" гээд хүсэлт гаргах уу. Ийм боломжтой хүн хэр байгаа вэ. 

Тусгаарлан ажиглах байрны төлбөрийг төлөх боломжгүй бол ойрын хавьтал болсноо нуух, эсвэл халдвар тараагаад явж бай гэсэн үг болж таарах нь уу.

Коронавирусний халдварыг цар тахал болтол нь даамжруулчихаад өнөөдөр энэ мэт ард түмнээ доромжилж тохуурхсан журам, шийдвэр гаргаж байх. 

Б.Баатар