Засгийн газар ээлжит бусаар хуралдаж, хатуу хөл хорио тогтоох эсэх асуудлыг хэлэлцэж, дөрөвдүгээр сарын 10-наас 25-ны өдрийг хүртэл 15 хоногийн улаан түвшинд буюу Гамшгаас хамгаалах бүх нийтийн бэлэн байдалд шилжих хатуу хөл хорио тогтоох шийдвэрийг гаргалаа. Засгийн газраас гаргасан шийдвэртэй холбоотой асуудлаар сэтгүүлчдийн асуултад Сангийн сайд Б.Жавхлан хариуллаа. 

-Хөл хорионы нөхөн олговор гэж иргэн бүрт 300 мянган төгрөгийн дэмжлэг олгоно гэлээ. Хэдийнээс олгож эхлэх вэ. Хэчнээн хоногт багтаах бол?

-Сангийн сайд Б.Жавхлан: Монгол Улсын 3.3 сая иргэн бүрд тус бүр 300 мянган төгрөгийн санхүүгийн дэмжлэгийг өнөөдрөөс олгоно. Зарим иргэн дансгүй учраас шинээр нээх ажил хийнэ. Иргэдийн тэтгэвэр, хүүхдийн мөнгө, и-баримт, 1072 хувьцааны данс, буюу бүртгэлтэй, ашигладаг данс руу Өнөөдрөөс эхлэн мөнгийг шилжүүлнэ. Энэ дэмжлэгийг олгоход 7-10 хоног шаардагдах болов уу. Аль болох хурдан хугацаанд энэ дэмжлэгийг өгнө. Энэ хэрээр бараа, бүтээгдэхүүний үнэ өсч, зохиомол хомсдол үүсэхвий гэсэн болгоомжлол байна. Үүний эсрэг Засгийн газар, Төв банк анхаарал тавьж, бодлогоор дэмжиж, ажиллана. 

-Өнөөдөр зарим цэгт вакцин дууссан хийхгүй гэсэн байсан. Хангалт, нөөц хэр байгаа вэ. Файзер вакцинаас нэмж худалдан авалт хийх үү?

-Нэмж татаж авахаар гэрээгээ хийсэн. Тавдугаар сард оруулж ирэх байх. Өмнө төлөвлөж байснаасаа хэд дахин давуулж, хангалттай хэмжээгээр оруулж ирнэ. 

-Хэчнээн аж ахуйн нэгж, байгууллага, иргэн гурван хувийн хүүтэй зээл аваад байна вэ. Явц ямар байна вэ?

-Яг өнөөдрийн байдлаар 400 гаруй тэрбум төгрөгийн зээлийг олгосон байна. Нийт тоогоор бол, 5000 гаруй аж ахуйн нэгж, иргэн авсан. Тавдугаар сар гэхэд хоёр их наяд төгрөгийн зээлийг гаргаж, эздэдээ очих байх. Зээлийн нийлүүлэлтийн үр дүн эдийн засагт нааштай гарч байна. Тухайлбал, төсвийн гүйцэтгэл 90 хувьтай гарсан гэсэн үг.

У.Тэргэл