УИХ-ын гишүүн Б.Пүрэвдорж согтуугаар автомашин жолоодон, зам тээврийн ноцтой осол гаргасан билээ. Уг ослын бичлэг өчигдөр нийтэд ил болсон ба түүний автомашин асар хурдтайгаар сум шиг давхиж, удалгүй “нисэж” хэд годройтон, хашлага мөргөөд зогссон билээ. Эцэстээ шатаж эхэлсэн гээд кинон дээр гардаг шиг л үйл явц болжээ. Хатуу хөл хорионы улмаас хөдөлгөөн сийрэг байж, асар хурдтай давхих түүний автомашинд азаар хүн, машин өртсөнгүй, харин өөрөө шалбараад л өнгөрсөн нь хувь заяа түшсэн гэлтэй.

Хууль тогтоогч эрхэм гишүүн хатуу хөл хорио тогтоосон энэ үед дээд зэргийн буюу 1.31 бүхэл согтолттойгоор автомашин жолоодон, замдаа таарсан бүхнийг яаж ч мэдэхээр аашилсан нь үнэхээр нийгмийг цочирдуулсан билээ. Ийм л ёс суртахуунтай хүнийг төрийн түшээгээр залсан нь шившиг юм. Тиймээс энэ удаагийн ноцтой үйлдлийг нь өршөөхгүйгээр үл барам эгүүлэн татах асуудлыг ч хөндөх учиртай. УИХ-ын чуулганы танхимд шударга ёсыг байнга нэхэж, шударга дүр эсгэж суудаг тэрбээр одоо өөрөөсөө энэ тухай асуух болж байна. УИХ-ын Ёс зүйн хороо ч энэ мэт овлигогүй гишүүдийнхээ толгойг илээд өнгөрөөгөөд баймааргүй байна. Төрийн түшээ гэхээрээ л дураараа аашилж, гэм зэмгүй өнгөрдөг энэ байдал залууст ямар үлгэр дууриалал үзүүлж буйг давхар бодолцох учиртай юм.  

У.Тэргэл