Монгол Улсын Үндсэн хуулийн цэцийн 2021 оны дөрөвдүгээр сарын 16-ны өдрийн дунд суудлын хуралдаанаар Монгол Улсын Ерөнхийлөгчийн сонгуулийн тухай хуулийн 3 дугаар зүйлийн 3.1.2 дахь заалт, 5 дугаар зүйлийн 5.4, 5.6, 26 дугаар зүйлийн 26.2 дахь хэсэг тус тус Монгол Улсын Үндсэн хуулийн холбогдох заалтыг зөрчсөн эсэх маргааныг хянан хэлэлцэж, 02 дугаар дүгнэлт гаргасан.

Энэхүү дүгнэлтээр тус хуулийн 3 дугаар зүйлийн 3.1.2 дахь заалт болон 5 дугаар зүйлийн 5.4 дэх хэсгийн зарим заалт Үндсэн хуулийн холбогдох заалтыг зөрчсөн гэж үзэж мөн өдрөөс түдгэлзүүлэн, 5 дугаар зүйлийн 5.6, 26 дугаар зүйлийн 26.2 дахь хэсгийг Үндсэн хуулийн холбогдох заалтыг зөрчөөгүй хэмээн шийдвэрлэсэн билээ.

Тодруулбал, хуралдаанаар Монгол Улсын Ерөнхийлөгч Х.Баттулгыг дахин нэр дэвших эрхгүй гэж үзсэн. 

Тэгвэл Цэц дээрх шийдвэрээ УИХ-д өчигдөр өргөн барьсан. Уг дүгнэлтийг УИХ 15 хоногийн дотор хэлэлцэх хуулийн зохицуулалттай. Энэ дагуу өнөөдөр Хууль зүйн байнгын хороо тус асуудлыг хэлэлцэж байна. Эх сурвалжийн мэдээлж буйгаар тус байнгын хороо Цэцийн дүгнэлтийг хаалттай хэлэлцэж байгаа бөгөөд Төрийн ордоны дотоод сүлжээг түр хязгаарлажээ.  

Дашрамд өгүүлэхэд УИХ Үндсэн хуулийн цэцийн дүгнэлтийг хүлээн авсан тохиолдолд шийдвэр хүчин төгөлдөр болох юм. Харин УИХ-ын тогтоолд Ерөнхийлөгч хориг тавих эрхтэй бөгөөд хоригийг нийт гишүүдийн гуравны хоёроор шийдэх хуулийн гаргалгаатай. 

Б.Баатар