Хууль зүйн байнгын хорооны өнөөдрийн хуралдаанаар Цэцийн дунд суудлын хуралдааны дүгнэлтийг хаалттай хэлэлцэж байна. Энэ үеэр УИХ-ын гишүүн Т.Доржханд ”Цэцийн хуралдаанд суусан хүний хувьд үгээ хэлье гэж бодлоо. Д.Ганбат гишүүн та хариуцлагатай байгаарай. Улс төрийн намыг тоглоомын нам гэж хэлдэг. Парламентын алдаа нь үнэн шүү дээ. Өмнө би энэ асуудлыг гаргаж тавихад АН-ынхан бүгд доошоо хараад сууж байсан шүү дээ.

Ардчиллын зарчим яриад хувь нам руу халдах хэрэггүй. Зургаахан  сарын дараа Ерөнхийлөгчийн сонгууль болох гэж байхад ямар хүнийг дэвшүүлэхээ мэдэхгүй, ямар дүрмээр тоглохоо мэдэхгүй сууж байгаа, та нар. Үүнийг л ҮХЦ дээр авачиж асуудал болгон ярьсан. ҮХЦ-д маш их нөлөөлөл орсон. Хэлэлцэхгүй гэж маш их чичирч дайрсан.

Хуралдааны танхимд 3 цагийн турш халуухан мэтгэлцээн болсон шүү. Мэтгэлцээний үеэр гарч ирсэн нэг мэдээлэл бол  яагаад 5 хүний эрх чөлөөг хангаад байгаа юм гэдэгт маш их акцент өгсөн.

Энэ чиглэлээр маш их мэтгэлцээн явсан шүү. 100 мянган нэр дэвших боломжтой залуус хуулийн хоригт ороод эрхийг нь хягаарласан байгаа шүү. УИХ энэ эрх ашгийг хаачихаад таван даргад тохируулсан заалтыг санаатайгаар орхигдуулсан. Тэгш байх ёстой. Монгол Улсад хууль засаглах уу, хувь хүн засаглах уу. Улс төрийн нам нөлөөлөөд байх уу маш том шийдвэрт бид цэг тавьсан шүү. ҮХЦ цаашид бие даасан шийдвэр гаргахад анхаарах ёстой. Хэн нэгэн нөлөөлөхгүй байхыг бид хуульчилж өгөх ёстой юм билээ” гэв.

У.Тэргэл