Эрүүл мэндийн ажилтны ҮЭХ-ноос ХӨСҮТ-ийн эмч нар PCR шинжилгээг хуурамчаар үйлддэг гэх мэдээлэл цацагдсантай холбоотойгоор мэдээлэл хийлээ. 

ХӨСҮТ-ийн үйлдвэрчний хорооны дарга О.Баатарчулуун "ХӨСҮТ-д Тагнуул, эдийн засгийн гэмт хэрэгтэй тэмцэх газраас шалгалт орсон. Шалгалттай холбоотойгоор Livetv.mn сайт дээр зохиолтой, цар тахлын голомтод ажиллаж буй эмч нарыг буруутгасан нэвтрүүлэг гарсан. Бодит байдлаас илт гуйвуулсан энэ нэвтрүүлэг ХӨСҮТ-ийн ажилчдад маш хүнд цохилт болсон ба сэтгэл санааны маш хүнд байдалд орлоо. Бодит байдлаас илт гуйвуулсан мэдээлэл тараасан. Энэ нь бидэнд маш хүнд цохилт болж байна. 

Ажлаа хийх ямар ч хүч тэнхэлгүй болчихлоо. Яагаад хоёр жил зүтгэчхээд хийсэн ажлынхаа хариуд буруутгагдаж байгаа юм бэ.  Уг мэдээлэлтэй холбоотойгоор цахим хаягуудаар мэдээллийг батлагдсан мэтээр мэдээлж байна. Тэр ч байтугай 50 мянган хүний хариуг 80 мянган төгрөгөөр сөрөг гаргасан гэх мэдээлэл гарч байна. Сайханхүү эмч арай ч дээ гэх мэдээлэл ч цахим сүлжээнд явж байна. Энэ бол зохион байгуулалттай улс төрийн гүтгэлэг гэж харж байна. Бүх бурууг ХӨСҮТ-рүү чихэж байна. 

Биднийг өдийг хүртэл хоёргүй сэтгэлээр ажиллахад Засгийн газрын шийдвэр зөв байсан юм уу. Өнөөгийн нөхцөл байдлыг манай мэргэжилтнүүд хэлж байсан. Дарга нарын гаргасан шийдвэр оновчгүй байсан учраас тахал ингэж хүндэрлээ. Тэд мэргэжилтнүүдийн гаргасан санал шийдвэрийг сонссон уу, эрдэмтдийн баг хөл хорио тогтоох шаардлагагүй гэж хэлж байсан. Энэ бүхний гор өнөөдөр гарч байна. Гэтэл энэ бүх буруугаа ХӨСҮТ-рүү чиглүүлж, худал мэдээлэл цацаж байгаад харамсаж байна. 

ХӨСҮТ-д ажиллаж байгаа эмч нарыг буруутгаж байгааг хүлээн зөвшөөрөхгүй. Цар тахлын голомтод ажиллаж байгаа төрийн алба хаагчид, эмч нар халдвар авч нас барж эхэлсэн. Энэ бүхнийг хуулийн байгууллага нь шалгаж, хурдан хариугаа хэлэх хэрэгтэй байна" гэлээ. 

Монголын эрүүл мэндийн ажилтны үйлдвэрчний эвлэлийн холбооны дарга Х.Ариунаа “Өнөөдөр нөхцөл байдал маш хүнд байна. Гэтэл мөрөөрөө ажлаа хийж яваа хүмүүс рүү дайрч, хууль хяналтын байгууллагын шалгаж дуусаагүй асуудлыг даамжруулж, тэдний нэр хүндэд халдаж байгаад маш их гомдолтой байна. Тиймээс мянга мянган ажилчдынхаа эрх ашгийг хамгаалж явдаг байгууллагын хувьд өнөөдөр мэдээлэл хийж байна. Эрүүл мэндийн салбарынхан огт алдаа мадаг гаргахгүй, төгс ажиллаж байгаа гэж хэлэхгүй ээ, алдаа гарах тохиолдол бий. Гэхдээ алдаа гаргасан хэдэн хүмүүсийн өмнөөс салбарын 56 мянга гаруй ажилчдыг харлуулж болохгүй” гэв. 

Б.Баатар