Монгол Улсын Ерөнхийлөгч аргаа барж, амь тавих нь. Тэрбээр Цэцийн дүгнэлтэд найдаж суусан ч энэ нь талаар болсон. Уур хорслоо гудамжинд гаргахыг хүссэн ч цар тахлын улмаас хатуу хөл хорио тогтоосон байгаа цаг үе. Тиймээс МАН-ыг татан буулгах захирамж гаргаж, ЗХЖШ-руу нэг гүйж очин үүрэг даалгавар өгч байж сууж, ядаж байна.

Эцэстээ аргаа барахдаа шинээр баталсан Үндсэн хуульд Монгол Улсын Ерөнхийлөгчийг зургаан жилээр нэг удаа сонгоно гэсэн заалтыг шүүрч авч, үүнд тоглолт хийж эхэллээ.

Х.Баттулга 2017 оны долоодугаар сарын 10-нд Монгол Улсын Ерөнхийлөгчийн тангаргаа өргөж байв. Тиймээс тэрбээр 2023 оныг хүртэл Ерөнхийлөгчийн албан тушаалаа хаших ёстой хэмээн зүтгэхээр шийджээ. Энэ талаар АН-ын хуучин лидерүүд болох Р.Амаржаргал, Р.Гончигдорж нараар энэхүү хувилбарыг дэмжсэн байдлаар яриулж, нийтэд ойлгуулахыг хичээж байна. Мэдээж хоёр жил гэдэг Ерөнхийлөгчийн хувьд их цаг хугацаа. Тиймээс албаа үргэлжлүүлэн хоёр жил хийх нь түүнд юунаас ч илүү ашиг тустай. Нөгөөтэйгүүр, дутуугаа, хүссэнээ гүйцээх үнэтэй цаг хугацаа юм. 

Ерөнхийлөгч Х.Баттулгын хувьд ийн улайран зүтгэхээс аргагүй юм. Учир нь, түүнийг Төрийн тэргүүний сэнтийгээс буунгуут Төмөр замын, “Хонгил”-ын шүүгчдийн, ҮАБЗ-ийнхөн хатуу хөл хорионы үеэр хил даван 20 сая ам,долларыг оруулж ирсэн зэрэг дуулиант олон хэргийг шалгаж, тэрбээр яалт ч үгүй тайлбар мэдүүлэг өгч таарна. Цаашлаад ял шийтгэл хүлээж ч магадгүй нөхцөл байдал үүсээд байгаа тул ийн улайран дайрахаас өөр зам түүнд үлдсэнгүй.

У.Тэргэл