Коронавирусний халдвар хэдийнэ цар тахал болж, гамшгийн хэмжээнд хүрлээ. Халдвараас сэргийлэх вакцинжуулалт насанд хүрэгчдэд хийж байгаа ч дэлхий дахинаа бага насны хүүхдэд хийх вакцин өнөөдрийг хүртэл гарuаагүй байгаа. Гэтэл уг халдвараар хэдэн мянган хүүхэд өвчилж байгаа харамсалтай мэдээ өдөр бүр гарах болов. Манай улсын хэмжээнд өчигдрийн байдлаар 4412 хүүхэд уг вирусний халдвараар өвчилсөн байна. 

Халдварт өртсөн хүүхдүүдийг насны бүлгээр нь авч үзвэл 0-4 насны 1,034, 5-9 насны 1,406, 10-14 насны 1,356, 15-18 насны 616 хүүхэд байна. 

Харин халдвар авсан хүүхдүүдийг харьяалалыг нь авч үзэхэд Улаанбаатар хотод хамгийн их хүүхэд буюу 3920 хүүхэд халдвар авчээ. Харин Төв аймагт 128, Сэлэнгэ 81, Орхон 55, Дархан 52, Өвөрхангай 41, Архангай 21, Ховд 21, Дорногвь 18, Сүхбаатар 16, Хөвсгөл 10, Булган 6, Дундговь 6, Хэнтий 4, Баянхонгор 3, Говьсүмбэр 3, Завхан 2, Дорнод 1 хүүхэд коронавирусний халдвараар өвчилсөн байна. 

Хэдийгээр эдгээр хүүхдийн дунд хүндэрсэн тохиолдол одоогоор харьцангуй бага ч хүндрэх эрсдэл бий гэдгийг эмч мэргэжилтнүүд зөвлөж байгаа.

Хэрэв хүүхдүүдийн биеийн байдал хүндэрвэл зүрх судас, бөөр, мэдрэлийн эд эсийг гэмтээх эрсдэлтэй байдаг аж.

Коронавирус нь маш олон эд эрхтэнг гэмтээх, халдварын дараа удаан хугацаагаар ядрах, үс унах, шинж тэмдэг илэрсэн тохиолдлууд бүртгэгдэж байгаа учир хүн бүр бяцхан үрсээ халдвараас хамгаалах шаардлагатай байгаа юм.

Түүнчлэн бага насныхан шинж тэмдэггүй халдвар тараагч болж байгаа талаар ч ХӨСҮТ-ийн захирал Л.Баттөр мэдээлсэн. Тэрбээр энэ талаар "Аав, ээж нь гэртээ халдвар авч ирдэг байсан бол одоо хүүхдүүд халдвар тараах эх үүсвэр болж байна. Тоглоомын талбай дүүрэн хүүхдүүд. 17-с бага насныхан шинж тэмдэггүй халдвар тараагч болж байна. Халдвар авсан хүмүүсийн 20 хувь нь хүүхдүүд" байгааг тодотгосон. 

Тиймээс урин дулаан цаг ирсэн энэ үед эцэг, эх, асран хамгаалагчид нь үр хүүхдийнхээ эрүүл мэндэд анхаарч, халдвар хамгааллын дэглэм сахиулахгүй бол коронавирусний халдвар бяцхан үрсийг минь хэдийнэ "онилсон" гэдгийг хэрхэвч мартаж болохгүй юм. 

Б.Баатар