УИХ-ын чуулганы хуралдаанаар Монгол Улсын Үндсэн хуулийн цэцийн 2021 оны 02 дугаар дүгнэлтийг хэлэлцэж байна. Хуралдааны эхэнд УИХ-ын гишүүн С.Одонтуяа коронавирусний нөхцөл байдлын талаар мэдээлэл сонсох горимын санал гаргалаа.

Тэрбээр “цар тахлын эсрэг түр хороо байгуулсан ч өнгөрсөн гурван долоо хоногийн хугацаанд нэг ч удаа хуралдаагүй. Тиймээс цар тахалтай холбоотой мэдээлэл сонсох асуудлыг хэлэлцэх асуудлын дараалалд оруулж өгөхийг хүсч байна. Энэ хуралд Ерөнхий сайд, УОК оролцох ёстой. Цаашид цар тахлаа барьж чадах юм уу, үгүй юм уу. Үүнийг хэлэлцэх ёстой.

Өмнөх Засгийн газар нимгэн хувцастай гаргасан ээжээс болж огцорсон. Гэтэл өнөөдөр 56 хүн нас бараад байна. Хүүхдийн өвчлөл 5000 гараад явчихлаа. Замын-Үүд дээрх автомашины авлига гаарч байна. Хорих ангиудад хүний эрхийг ноцтойгоор зөрчиж байна" гэлээ. С.Одонтуяа гишүүний горимын саналыг УИХ-ын дарга хүлээн авч, маргаашийн 14:00 цагаас хэлэлцэх асуудлын дараалалд оруулахаар тогтлоо.

У.Тэргэл