УИХ-ын өнөөдрийн чуулганаар Үндсэн хуулийн цэцийн 2021 оны 02 дугаар дүгнэлтийг хэлэлцэж байна. Энэ үеэр гишүүд асуулт асууж үг хэллээ.

Ц.Туваан: Монгол Улсад нэг намын дарангуйлал тогтлоо. Энэ талаар өмнө нь би хэлж байсан. Өнгөрсөн баасан гарагт гарсан Цэцийн шийдвэрийг баталж байна гэдгийг ард түмэндээ хэлье. УИХ хууль бус асуудлыг байнгын хороо, чуулганы хуралдаанаар хэлэлцүүлээд явж байгаа нь асуудал. Үндсэн хуулийн өөрчлөлт чинь таван хүний нэр дэвших эрхийг хасах гэж орсон өөрчлөлт байсан юм уу. Цэц ямар хурдан дүгнэлтээ гаргадаг болчихсон юм.

Монгол Улсын Үндсэн хульд зөвхөн нэг удаа, зургаан жилээр гээд заасан. Ингэхдээ ямар нэгэн хаалт байхгүй шүү. Гэтэл Монгол Улсад зургаан жилээр сонгогдсон хүн байгаа юм уу. Монгол Улс парламентын засаглалтай. Парламент нь хууль тогтоомжоо баталдаг тэр зарчим чинь яасан юм гэлээ. 

Түүнчлэн чуулганы хуралдааны үеэр УИХ-ын гишүүн Ц.Мөнх-Оргил АН Ерөнхийлөгчийн сонгуулийн тухай хуулийг зөрчиж гаднын байгууллагад мөнгө төлж үйл ажиллагаа явуулж байгаа талаар дурдсан. Тэгвэл уг асуудалд Ц.Туваан гишүүн "Би 50 мянган ам.доллар байтугай 5 ам.доллар ч хүнд төлж юм хийлгээгүй гэдгийг хариуцлагатай хэлье. АН тийм баян нам биш. Ц.Мөнх-Оргил гишүүн андуурсан байх" гэдэг хариулт өглөө.

А.Сүх