Коронавирусээр өвчилсөн хүмүүсийн тоо өдрөөс өдөрт нэмэгдэж, эмнэлгийн орны хүрэлцээ тааруу болоод нэлээд хугацаа өнгөрлөө. Тиймээс ч сүүлийн үед иргэдийг гэрээр эмчилж байгаа. Эмчилж байгаа ч биш иргэд өөрсдийгөө гэрээр эмчлэх болсон нь нууц биш. Шуудхан хэлэхэд коронавирус бараг л хяналтаас гарч байх шиг.
Уг өвчнөөр 25 мянга гаруй хүн өвчилж, өдгөө 14 мянга орчим хүн эмчлүүлж байгаа гэх тоон мэдээ бий. Үүгээр ч зогсохгүй халдварт өвчний улмаас 68 хүний амь эрсдээд буй. Үнэхээр харамсалтай, халаглам тоо баримтууд. Нөхцөл байдал ийм дээрээ тулчихаад байхад tрүүл мэнд, эдийн засаг хоёроо хамтад нь авч явна хэмээн уулгалан хашгирч байсан улстөрчид өнөөдөр нам гүм.
Иргэн бүрд олгосон 300 мянган төгрөгийн ачаар л ард түмэн бүсээ чангалаад тэсэж байна. Энэ байдал хэдий болтол үргэлжлэх бол. Хөл хориог сунгах талаар ч ярьж эхэллээ.
Одоо ганцхан сонголт л байна. Коронавирусээс урьдчилан сэргийлэх болон өвчилсөн тохиолдлын аль алинд нь витамин С, витамин Д-г өндөр тунгаар уух шаардлагатай гэгдэж буй. Тэгвэл эдгээр эм бэлдмэлийн үнэд хяналт тавьж, эрүүл мэндийн даатгалаар олгох хэрэгтэй мэт санагдах. Боломж нь байвал иргэн бүрт хүрэлцээтэй хэмжээтэйгээр нь тарааж өгөх.
Үүнийг ч эмч, мэргэжилтэнгүүд зөвлөж байна. Энэ талаар Эрүүл мэндийн сайд асан А.Цогцэцэг "Вирусийн эсрэг эмийн татан авалт хүртээмж нөөц нь хэр байгаа юм бол доо. Даатгалд оуулчихвол хямдраад хүртээмж нь нэмэгдээд тэр хэрээр ковидын хүндрэл багасна" гэдгийг хэлсэн.
Өнөөдөр эмийн сангуудад хамгийн эрэлттэй байгаа эмийн жагсаалтыг яах аргагүй витамин С, витамин Д эзэлж байгаа. Үнэ, олдоц нь тийм ч боломжийн бус. Тодотговол, өндөр тунтай буюу 1000 мг-тай витамин С нэг ширхэг нь ойролцоогоор 460-800 үнээр борлуулж байгаа бол 4000 мг-тай витамин Д 250-330 төгрөгийн үнэтэй зарж байна. Гэхдээ олдоц маш муу. Хаа нэг эмийн санд л цөөн тоогоор байх. Эдгээр эмийг өдөр бүр, өрхийг гишүүд бүгд ууна гэхээр мөн нэлээд төсөв шаардлагатай болох нь.
Харин эмийн үнийг хөнгөлж, нийлүүлэлтийг нэмбэл тэр хэрээрээ иргэд худалдан авч, коронавирусээс сэргийлэх, өвчилсөн ч хүндрэх эрсдэлийг бууруулах боломжтой болно.
Дархлаажуулалтад хамрагдсан иргэд ч өвчилсөөр байгаа учир урьдчилан сэргийлэх эм бэлдмэлд мөн ач холбогдол өгөх нь чухал мэт.
Б.Баатар
