Улстөрчид вакцин татан авалтад саад учруулж байгаа талаар Ерөнхий сайд Л.Оюун-Эрдэнийн хэлсэн үг иргэдийн анхаарлыг татаж, тэдгээр хүмүүс хэн бэ хэмээх асуулт үлдээж, хувь хувьдаа таавар таахад хүргэж байна. Түүний мэдэгдлийг удахгүй болох Ерөнхийлөгчийн сонгуультай холбогдуулж тайлбарлах нэгэн нь ч бий.
Тодруулбал, тэрбээр мэдээллийнхээ үеэрээ “Улстөрчид нэг ч вакцин авчирч, нэг ч вакцин үйлдвэрлэж чадахгүй байж, нэмэр болохоосоо илүү битгий гай болооч ээ. Зарим вакцины татан авалтад манай зарим улстөрчдийн хариуцлагагүй асуудал нөлөөлсөн. Миний хувьд цар тахлын хажуугаар улстөржихгүй явах гэж хичээж ажиллаж байна. Гэхдээ би тэвчээд дуугүй яваад байдаг зан харилцаатай хүн биш. Шаардлагатай бол тэр гишүүдийг би зарлана. Энэ цаг үед ард түмний эрүүл мэнд, эрүүл мэндийн системийн эсрэг, хариуцлагагүй мэдэгдэл хийж, энд тэнд буруу мэдээлэл өгч байгаа нь өөрөө эх орноосоо урвасан үйлдэл” хэмээсэн юм. Мөн уг асуудалд нэр холбогдсон нэр бүхий гишүүдийн нэрийг Ерөнхийлөгчийн сонгуулийн дараа олон нийтэд зарлана гэдгээ мэдэгдсэн.
Ерөнхий сайдын мэдэгдэлд дээрх асуудлыг "эх орноосоо үйлдэл" гэжээ. Хэрэв түүний эл мэдээлэл баттай бол хуулийн байгууллагад хандаж шалгуулах ёстой. Гэмт хэргийг мэдсэн хэрнээ мэдээлэхгүй байна гэдэг нь өөрөө “зөрчил” гэж Зөрчлийн тухай хуульд дараах байдлаар заажээ. Үүнд,
15.10 дугаар зүйл.Гэмт хэргийг үл мэдээлэх
1.Санаатай хүнд гэмт хэргийг үйлдэхээр бэлтгэж байгаа, эсхүл үйлдсэнийг лавтай мэдсэн атлаа эрх бүхий байгууллага, албан тушаалтанд мэдээлээгүй бол хүнийг таван зуун нэгжтэй тэнцэх хэмжээний төгрөгөөр, хуулийн этгээдийг таван мянган нэгжтэй тэнцэх хэмжээний төгрөгөөр торгоно.
15.11 дүгээр зүйл.Гэмт хэргийг нуун далдлах
1.Санаатай хүнд гэмт хэргийг урьдаас амлалгүйгээр нуун далдалсан бол хүнийг долоон зуун тавин нэгжтэй тэнцэх хэмжээний төгрөгөөр, хуулийн этгээдийг долоон мянга таван зуун нэгжтэй тэнцэх хэмжээний төгрөгөөр торгоно.
Өнөөдөр бол цар тахлын онцгой нөхцөл байдлын үе. Энэ үед нэг ч гэсэн иргэнээ халдвар тусахаас, амь насыг нь эрсдэхээс хамгаалах гэж дээр дооргүй хичээж байна. Үнэхээр вакцин татан авалтад саад учруулсан асуудал гарсан хийгээд энэ нь гэмт хэргийн шинжид хамаарах бол хэргийг үл мэдээлсэн асуудлаар Зөрчлийн тухай хуулиар хариуцлага хүлээх нь байна. Тиймээс олон нийтийн эргэлзээг арилгаж, уг асуудлыг нэг мөр цэгцэлсэн нь зөв болов уу, сайд аа.
А.Сүх
