Монгол Улсын Ерөнхийлөгчийн сонгууль дөхсөний дохио нь АН, МАН гэсэн хоёр нам нэгнийхээ хөдөлж, аашилж буйд хүртэл шүүмжлэлтэй хандах боллоо. Эцэстээ энэ нь хэсэг хүний хэрүүл болж,  би, чи гэдэгтээ хүрэв. Тодруулбал, УИХ-ын гишүүн Ч.Хүрэлбаатар улс төрийн соёл гаргаж,  "МАН-аас У.Хүрэлсүх, АН-аас С.Эрдэнэ, ХҮН-аас Д.Энхбат нэр дэвшихээр болжээ. Монгол төрийн тэргүүний хариуцлагатай сонгуульд нэр дэвшиж буй та бүгдэд амжилт хүсье" хэмээн өөрийн цахим хуудастаа нийтэлчихжээ.

Гэтэл удалгүй АН-ын Улс төрийн зөвлөлөөс МАН-ын Удирдах зөвлөлд “Хариуцлагатай албан тушаалтны олон нийтийн сүлжээнд тавьсан энэ мэдээлэл төрийн байгууллагын үйл ажиллагаанд хөндлөнгөөс нөлөөлж, оролцож, сонгуулийн төв байгууллагын хараат бус, бие даасан байдалд нөлөөлөх гэсэн оролдлого гэж бид үзэж байна. Улмаар намын үйл ажиллагаанд хөндлөнгөөс үл оролцох гэсэн хуулиар хориглосон үйлдлийг зөрчлөө. Тиймээс хууль зөрчсөн үйлдлээ зогсоохыг шаардаж байна" гэсэн агуулга бүхий удирдамж хүргүүлсэн байна.

Ерөнхийлөгчийн сонгуульд нь амжилт хүссэнийхээ төлөө нэг намын үйл ажиллагаанд хөндлөнгөөс хошуу дүрж, сонгуульд нь нөлөөлөх гэлээ хэмээн шүүмжлэлд өртөөд байгаа Ч.Хүрэлбаатар гишүүн хариуд нь “Ерөнхийлөгчид нэр дэвшсэн хүмүүст амжилт хүссэн чинь “АН-ын Удирдах зөвлөл намайг тэдний дотоод асуудалд оролцлоо гэж. Амжилт хүсэж болохоо больсон цаг уу. Бага доромжлоорой” хэмээн бухимдлаа илэрхийлжээ. Үнэхээр л нэгэндээ амжилт хүсэж болохоо байсан цаг уу.

У.Тэргэл