УИХ-ын хоёр байнгын хороо өнөөдөр хуралдана. Тодруулбал, Эдийн засгийн байнгын хороо хуралдаж, Банк, эрх бүхий хуулийн этгээдийн мөнгөн хадгаламж, мөнгөн хөрөнгийн шилжүүлэг, зээлийн үйл ажиллагааны тухай хуулийн шинэчилсэн найруулгын төслийн анхны хэлэлцүүлгийг хийнэ.
Мөн Хууль зүйн байнгын хороо хуралдаж, Монгол Улсын Үндсэн хуулийн Цэцийн 2021 оны 03 дугаар дүгнэлтийг хүлээж авах эсэхийг хэлэлцэх юм. Үндсэн хуулийн Цэц өнгөрсөн долоо хоногт Шүүхийн тухай хуулийн зарим заалт Үндсэн хууль зөрчсөн хэмээн түдгэлзүүлэх шийдвэр гаргасан. Тодруулбал, Шүүхийн ерөнхий зөвлөл болон Сахилгын хорооны шүүгч бус гишүүдийг УИХ дангаар томилох нь Үндсэн хуулиар хамгаалагдсан төрийн эрх мэдлийг хуваарилах зарчмыг алдагдуулсан гэж Цэц дүгнэсэн юм.
