Олимпийн аварга, МҮОХ-ны Ерөнхийлөгч Н.Түвшинбаярыг үргэлжлүүлэн цагдан хорих эсэхийг шийдвэрлэх шүүх хурал өнөөдөр ХАн-Уул дүүргийн эрүүгийн хэргийн шүүхэд 13.30 цагт болно.

Н.Түвшинбаярыг улсын начин Э.Энхбатыг хэрцгийгээр зодож, хүнд гэмтэл учруулсан үйлдэлд нь Хан-Уул дүүргийн Эрүүгийн хэргийн анхан шатны шүүхээс дөрөвдүгээр сарын 25-ны өдрийг хүртэл ШШГЕГ-ын харьяа 461 дүгээр хорих ангид цагдан хорихоор шийдвэрлэсэн. Цаашлаад энэ хугацаа дуусгавар болонгуут яллагдагчаар татан, дахин 10 хоног буюу тавдугаар сарын 5-ныг хүртэл цагдан хорих, таслан сэргийлэх арга хэмжээ авсан билээ. Ийнхүү нэг сар хоригдсон түүнийг батлан даалтад гаргах, үргэлжлүүлэн хорих эсэхийг өнөөдөр шийднэ. Мөн Н.Түвшинбаяр цагдан хорих ангийн эмнэлэгт эмчлүүлж байхдаа коронавирусний халдвар авч, өдгөө эдгэж тусгаарлалтад гараад байгаа юм.

У.Тэргэл