Монгол Улсын Ерөнхий прокурор Б.Жаргалсайхан 2021 оны гуравдугаар сарын 12-ны өдөр тушаал гаргаж, сүүлийн үед хэвлэл мэдээллийн хэрэгслээр нийтэд мэдээлэн олны анхаарлын төвд орсон, мөн хууль хяналтын байгууллагын нэр бүхий ажилтнуудтай холбоотой хэргийг шуурхай шалгаж, шийдвэрлүүлэх ажлын хэсгийг байгуулсан билээ. Тодруулбал, нийгэмд дуулиан шуугиан тарьж, олны анхаарлын төвд орсон, нийтэд цацсан бичлэг, дэлгэсэн баримт бүрийг нягтлан шалгахыг Улсын ерөнхий прокурор үүрэгдсэн. Мөн ажлын хэсгийнхэн иргэдийн гомдол, мэдээллийг биечлэн хүлээн авч, шалгахаар болсон билээ.

Энэ цагаас хойш даруй хоёр сарын хугацаа өнгөрсөн ч үр дүн гарсан эсэх нь тодорхойгүй байна. Тухайлбал, “Хонгил”-ын өмгөөлөгч гэгдэх болсон Б.Баасанцогтод холбогдох хэрэг байна. Тэрбээр нэр бүхий шүүгчдийн данс руу мөнгө шилжүүлсэн, томоохон хэргүүдийн сценари гаргаж, схем зурсан баримт нь ч ил болсон билээ. Мөн прокурор, цагдаа, АТГ, ТЕГ-ын ажилтнууд руу удаа дараагийн үйлдлээр мөнгө шилжүүлсэн баримтуудыг ч хуулийн байгууллагынхан илрүүлсэн. Мөн тэрбээр 15 удаагийн гүйлгээгээр 17,500,000 төгрөгийг Үндэсний аюулгүй байдлын зөвлөлийн нарийн бичгийн дарга А.Гансүхийн төрсөн А.Батхуяг руу, Үндсэн хуулийн цэцийн гишүүн Ц.Нанзаддорж руу 7,000,000 төгрөг, ТЕГ-ын ажилтан П.Ганбаатар руу хоёр удаагийн гүйлгээгээр 12,000,000 сая төгрөгийг тус тус шилжүүлсэн байдаг. Энэхүү жагсаалт цааш үргэлжилж, ҮАБЗ-ийн зөвлөлийн нарийн бичгийн дарга А.Гансүх 1,230,000, А.Гансүхийн эхнэр П.Золзаяа руу 10,650,000 төгрөг, Нийслэлийн захиргааны хэргийн давж заалдах шатны шүүх болон Зам тээврийн хөгжлийн яаманд ажиллаж байсан Т.Мөнх-Оргил руу 3,600,000 төгрөгийг тус тус шилжүүлсэн байдаг. Бүр Б.Сүндэръяа буюу Сүнээ рүү “Гансүхийн төлбөр” гэх гүйлгээний утгатайгаар 850,000 төгрөг шилжүүлсэн гээд ил болсон баримт олон.

Хамгийн ноцтой нь, Монгол Улсын Ерөнхийлөгч Х.Баттулгын туслахаар ажиллаж байсан Моёлын Отгонжаргалын хувьцаа эзэмшдэг "Юнайтед белаз машинери" ХХК-иас Б.Баасанцогт руу 70,000,000 төгрөгийг шилжүүлсэн баримт хуулийнхны гарт орсон.Энэ мэтчилэн өмгөөлөгч Б.Баасанцогтыг тойрсон толгой эргэм их мөнгөний учрыг хуулийнхан олох учиртай юм. 

Мөн өмгөөлөгч Б.Баасанцогтын хамсаатан Ц.Насанбат прокурор байна. Улс төрийнхний нэр холбогдсон олон том хэрэгт хяналт тавьж байсан тэрбээр  эрх мэдэл, албан тушаалаа ашиглан хэргийн хувь заяаг дураараа шийддэг байсан нь илчлэгдэж, түүнд хариуцлага тооцсон. Түүний албан тушаалыг бууруулж, Баянзүрх дүүргийн прокуророор томилсон ч эрүүгийн хариуцлагаас мултрах учиргүй юм. Ц.Насанбат прокурор өмгөөлөгч Б.Баасанцогттой их ойр бөгөөд тэдний уулзаж байгаа зураг ч дэлгэгдэж байлаа.

Цаашлаад хатуу хөл хорио тогтоосон үеэр ҮАБЗ-ийнхөн хил давж, 20 сая ам.доллартай буцаж ирсэн,   багын найз, улсын начин Э.Энхбатыг хэрцгийгээр зодож, хүндээр гэмтээсэн Н.Түвшинбаярт холбогдох хэрэг, УИХ-ын гишүүн А.Адъяасүрэнгийн 100 саяын авлигын гээд шалгавал зохих дуулиант олон хэрэг байна.

Харин таны үүрэгдсэний дагуу эдгээр хэргийг шалгах явц ямар шатандаа явна вэ, Б.Жаргалсайхан прокурор оо. Та хэзээ энэ тухайгаа нийтэд тайлагнаж, ажлынхаа үр дүнг мэдээлэх вэ.

У.Тэргэл