Нийгмийн даатгалын шимтгэлийг хоёр хувиар нэмж, нийт 26 хувийн шимтгэл авахаар болсон талаар НДЕГ-аас мэдээлж байсан. Гэвч энэхүү шийдвэрт аж ахуйн нэгж, байгууллага болоод ард иргэд ихээхэн бухимдалтай байгаа юм. 

Харин уг асуудалд Сангийн сайд Б.Жавхлан тайлбар өглөө. Тэрбээр "Долоодугаар сарын 1-нээс Нийгмийн даатгалын шимтгэлийг хоёр хувиар нэмэх асуудлыг 2017 онд шийдсэн байсан. ОУВС болон бусад улсын өмнө хүлээсэн үүрэг байгаа.

Тиймээс 2020 онд энэ асуудлыг шийдэх байсан ч бид хойшлуулсан. Одоо дахин хойшлуулах тухай ярилцаж байна.  Энэ асуудлыг Засгийн газар дэмжинэ гэдгийг Ерөнхий сайд өчигдөр 100 хоногийн тайлангийн хуралдааны үеэр хэлсэн" гэлээ.

Ерөнхий сайд дэмжихээ хэлчихсэн болохоор ерөнхийдөө шимтгэлийг хоёр хувиар нэмэх асуудлыг он гартал хойшлууллаа гэж ойлгож болох нь. Ямартай ч, цар тахлын энэ хүнд цагт аж ахуйн нэгж, байгууллага, иргэдэд ихээхэн тус дэм болох энэхүү шийдвэрт хэн бүхэн талархалтай хандах нь зайлшгүй.

У.Тэргэл