Дундговь аймгийн Засаг дарга Ц.Мөнхбат, аймгийн Эрүүл мэндийн газрын дарга Б.Алтантөгс нар цаг үеийн асуудлаар шуурхай мэдээлэл хийлээ. Ц.Мөнхбат “Дундговь аймгийн төвд коронвирусний халдвар илэрсэн гэх мэдээлэл тархаж иргэд айдас хүйдэстэй байна. Тиймээс албаны мэдээлэл өгөхөөр хандаж байна. Өнгөрсөн шөнө буюу тавдугаар сарын 10-ны 23 цагийн орчимд Дундговь аймгийг дайран өнгөрч Өмнөговь аймагт очих зорилготой ажлын томилолттой яваа цагдаагийн байгууллагын дөрвөн алба хаагч замдаа манай аймгийн зочид буудалд буудалласан. Тэд аймгийн постоор орж ирэхдээ вакцины хоёрдахь тундаа хамрагдсан гэдгээ хэлсэн.
Гэхдээ тэд УОК-ын заавар, зөвлөмжийг хэрэгжүүлэх үүднээс нөгөөтэйгүүр, болгоомжилж нийслэлээс гарахын өмнөх өдөр PCR шинжилгээ давхар өгсөн юм билээ. Гэтэл урд шөнийн 05 цагийн орчим шинжилгээний хариу гарч, дөрвөн хүний нэгийнх нь хариу эерэг гарсан байна. Тиймээс өчигдөр орой албаны журмаар уулзсан цагдаагийн алба хаагчдыг тусгаарлан, эрүүл мэндийн байгууллага тандалт судалгааг хийгээд явж байна.
Өнөөдрийн байдлаар, аймгийн цагдаагийн алба хаагч, буудалласан зочид буудлын үйлчилгээний ажилтнууд зэрэг ойрын хавьтлын 22 хүнийг тусгаарлаад байна. Тэднээс 72 цагийн дараа PCR шинжилгээг дахин авна. Шинжилгээ нь эерэг гарсан нэг хүнээ аймгийн ОБЕГ-аас автомашин гаргаж, цагдаагийн байгууллагын хамгаалалттайгаар Улаанбаатар хот руу буцаасан” гэв.
Мөн тус аймгийн Эрүүл мэндийн газрын дарга Б.Алтантөгс “Албан томилолтоор ирсэн цагдаагийн алба хаагчдын нэгээс халдвар илэрсэн тул албан ажлаар уулзаж, ажлаа танилцуулсан болон үйлчилгээний ажлаар уулзсан 22 хүнийг тогтоогоод байна. Цаашид тандалт судалгаа үргэлжилнэ. Энэ хүмүүс өнгөрсөн шөнө ирсэн учраас өөр газраар явсан маршрут байхгүй. Шууд зочид буудалд буусан байгаа. Хариу нь эерэг гарсан хүний хувьд дөрөвдүгээр сарын 20-нд Астразенека вакцины хоёрдахь тунгаа тариулсан хүн байгаа. Вакцины хоёрдахь тундаа хамрагдаад халдвар авч буй тохиолдол энэ мэтчилэн бүртгэгдэж байна. Вакциндаа хамрагдсан ч гэлээ халдварын голомт хэвээр байгаа тул Улаанбаатараас ирж байгаа иргэд эрсдэлтэй хэвээр байна. Орон нутгийн хувьд халдварын 55 тохиолдол бүртгэгдэж, эдгээрээс 53-ыг нь эмчилж, эмнэлгээс гаргасан сайхан мэдээтэй байна” гэлээ.
У.Тэргэл
