Ерөнхийлөгч Х.Баттулга Онц байдал зарлаж, Ерөнхийлөгчийн сонгуулийг хойшлуулж магадгүй гэдэг мэдээлэл сүүлийн үед зарим хэвлэл мэдээллийн хэрэгслээр гарах болсон. Тэгвэл УИХ чуулж байгаа энэ үед болон Үндэсний Аюулгүй байдлын зөвлөмж гарахгүйгээр Ерөнхийлөгч Онц байдал зарлах эрхгүй аж. 

Учир нь УИХ-ын чуулган чуулж буй үед онцгой нөхцөл үүсвэл УИХ онц байдал зарлах бөгөөд энэ үед Ерөнхийлөгч онц байдал зарлахгүй талаар Үндсэн хуулийн 25.1.8, 33.1.12-т тодорхой заасан. Мөн Онц байдлын тухай хуулийн 5.1-д “Үндсэн хуулийн 25.2-т заасан онцгой нөхцөл УИХ-ын ээлжит болон ээлжит бус чуулган чуулж байх үед бий болсон бол УИХ онц байдал зарлах тухай асуудлыг Ерөнхийлөгч, Засгийн газар эсхүл УИХ-ын нийт гишүүдийн дөрөвний нэгээс доошгүйн санаачилгаар хэлэлцэж шийдвэрлэнэ” гэсэн.

Харин уг хуулийн 5.3, 5.4-т “Үндсэн хуулийн 25.2-т заасан онцгой нөхцөл УИХ-ын чуулганы чөлөө цагт бий болсон бөгөөд үйл явцын өрнөлт нь онц байдал нэн даруй зарлахыг шаардаж байгаа хойшлуулшгүй тохиолдолд Үндэсний аюулгүй байдлын зөвлөлийн зөвлөмжөөр Ерөнхийлөгч Онц байдал зарлах тухай зарлиг гаргана”, “Ерөнхийлөгч энэ дагуу онц байдал зарласан бол УИХ ул зарлигийг гаргасан өдрөөс хойш 7 хоногийн дотор хэлэлцэж батлах буюу хүчингүй болгоно. УИХ онц байдал тогтоох шаардлагагүй гэж үзвэл уул шийдвэр гаргасан өдрөөс эхлэн Ерөнхийлөгчийн зарлиг хүчингүй болно” гэж тус тус заасан.

А.Сүх