УИХ-ын гишүүн, Ардчилсан намын дарга асан Ц.Туваан мэдээлэл хийж, өлсгөлөнгөө зогсоож байгаагаа мэдэгдлээ.
Тэрбээр "УИХ дахь Ардчилсан намын бүлгийн гишүүд шийдвэр гаргаж, Монгол Улсын Үндсэн хуульд заагдсан жагсаал цулаан зохион байгуулах эрхийнхээ дагуу өлсгөлөн зарлаж, улс төрийн тэмцэл хийлээ. Манай улсад нэг намын дарангуйлал тогтоод байсан учир бид зургаан цагийн суулт хийж, улмаар өлсгөлөн зарлаад долоо хоног тэмцлээ. Энэ хугацаанд нэг намын дарангуйлал аль хэдийнэ тогтсон байсан гэдгийг бид ард түмэнтэйгээ хамт харлаа. Үнэн шударга ёсны төлөө одоо тэмцэхгүй бол ирээдүй маань хүнд байдалд байх нь гэсэн нэгдмэл ойлголтод хүрч тэмцлээ эхлүүлсэн. Харин эрүүл мэндийн шалтгаанаар бүлгийн зарим гишүүн суулт хэлбэрээр тэмцэлээ үргэлжлүүлсэн.
Бид төр, ард түмний гүүр болох үүргээ биелүүлэн, улс төрийн зөвшилцөл хийж, өлсгөлөнгөө зогсоохоор боллоо. УИХ-ын дарга захирамж гаргаж, "Ажлын хэсэг" байгуулсан учир энэхүү шийдвэрийг гаргаж байна. Гэхдээ бид тэмцлээ энд хүрээд зогсоохгүй. УИХ-ын танхим, ард түмнийхээ дунд бүхий л хэлбэрээр тэмцэх болно. Биднийг дэмжиж байсан ард түмэндээ баярлалаа. Та бүхний дэмжлэг байгаагүй бол бид энэ хүртэл явахад хүнд байх байсан.
Долоо хоногийн өлсгөлөн гэдэг амаргүй юм байна. Бид энэ аргыг хэрэглэхээс өөр арга байгаагүй шүү. Монголд Ардчилал, шударга ёс мандан бадрах болтугай. Нэг намын дарангуйлал сөнөх болтугай" гэлээ.
Б.Баатар
Сэтгэгдэл (12)