УИХ-ын гишүүн асан Ц.Оюунгэрэл өчигдөр Ардчилсан намын гишүүнчлэлээсээ татгалзаж, өргөдлөө өгсөн билээ. Тэрбээр энэ даруйдаа шинэ нам байгуулж буйгаа мэдэгдэв.

Ц.Оюунгэрэл "Залуус, эмэгтэйчүүд, хөгжлийн бэрхшээлтэй иргэдийн төлөө энэхүү шийдвэргийг гаргалаа. Ардчилсан намд байхдаа тэдний төлөө олон зүйл хийхийг хичээсэн ч чадсангүй. 

Бүтэн 10 жил алдаж онож хичээсээр байсан ч хүссэн манлайлал, реформыг үүсгэж чадсангүй. Улс төрд 30 жил болсныхоо дараа эргээд харахад улс төр мөнгөтэй, эрх мэдэлтэй хүнд монополь орчинг бий болгосон хэвээр байна. Чадварлаг залуусыг улс төрд оруулах хүсэл байдаг. Ардчилсан намд байхдаа үүнийг хэрэгжүүлэх гээд чадсангүй. Үлдсэн улс төрийнхөө замналаа залуустаа зориулмаар байна. Өнгөрсөн хугацаанд өөрт нь зүтгэж байсан дарга нарын төлөө ажилламааргүй байна.

Залуусын мөрөөдлийг сонсож, Ардчилсан намд яагаад элсэж чадахгүй байгаа талаар асууж ярилцтал итгэл үнэмшил минь өөрчлөгдсөн. Иймээс үлдсэн идэвхтэй насаа залуустаа зориулж шинэ платформд үүсгэх шаардлагатай болсон. Тиймээс би шинэ нам үүсгэн байгуулж байна. Хоёр намд гишүүнчлэлтэй байх боломжгүй учир 29 жил харьяалагдаж байсан Ардчилсан намаас гарах хүсэлтээ нулимстай нүдтэйгээр өглөө. Намайг дэмжиж байсан маш олон хүн байсан. 

Ардчилсан нам шиг баруун төвийн үзэлтэй, хүмүүсийг бүх шатанд ялгахгүй жигд хамруулж чаддаг намыг байгуулахыг хүсэж байна. Тиймээс МАН, ХҮН, МАХН шиг зүүнийг баримтлахгүй. Намаа байгуулахаар олон нэр бодсоны эцэст "Иргэний оролцооны нэгдэл" намын нэрийг өнөөдөр баталгаажуулсан" гэлээ.

Б.Баатар