Нийслэлийн Баянзүрх, Сүхбаатар,Чингэлтэй дүүргийн Эрүүгийн хэргийн анхан шатны шүүх 2021 оны гуравдугаар сарын 3-ны өдрийн 10.00 цагт Ж.Эрдэнэбат, Б.Отгонбаатар, Д.Түвшинжаргал нарыг суллах өмгөөлөгчдийн хүсэлтийг хэлэлцээд, суллах шийдвэр гаргасан билээ.

Шүүх хавтас хэрэгт авагдсан бичгийн нотлох баримтууд, шүүхийн хэлэлцүүлэгт прокурор, өмгөөлөгчдөөс гаргасан тайлбар, яллагдагчдын эрүүл мэндийн байдлыг үндэслэн таслан сэргийлэх арга хэмжээг ийнхүү өөрчилсөн юм. Эх сурвалж мэдээлэхдээ, “Нэг шүүгдэгч нь ходоодны хорт хавдартай. Өнгөрсөн 2019 оны тавдугаар сард оношлуулахад ходоодны хорт хавдрын хоёрдугаар шатанд байсан. Тэр цагаас хойш есөн сар өнгөрлөө. Тиймээс нэг цагийн өмнө ч гэсэн суллах нь чухал” хэмээн онцолж байв.

Улсын Дээд шүүх 2021 оны нэгдүгээр сарын 15-нд Монгол Улсын Ерөнхий сайд асан Ж.Эрдэнэбат нарын таван хүнд холбогдох хэргийг хэлэлцээд, анхан шатны шүүхийн шийтгэх тогтоол, давж заалдах шатны шүүхийн магадлал нь хуулийн шаардлага хангаагүй гэсэн үндэслэлээр тус тус хүчингүй болгож, хэргийг прокурорт буцааж, шийдвэрлэсэн. Энэ үеэр шүүхээс хурлын шийдвэрийг танилцуулахдаа “Зарим шүүгдэгчдийн хууль ёсны эрхэнд хууль бусаар халдсан байна” гэж дүгнэснээ танилцуулсан билээ. Өөрөөр хэлбэл, Ж.Эрдэнэбатын УИХ-ын гишүүний бүрэн эрхэд халдсан байна гэдгийг Дээд шүүх тогтоосон гэсэн үг.

Ж.Эрдэнэбатын хувьд Монголын парламентад шоронгоос сонгогдсон ганц хүн юм. Хууль зүйн талаасаа ч тэр ял шийтгэл эдлэх эсэх нь тогтоогдоогүй учраас тэрбээр УИХ-ын хаврын чуулганаар гишүүний тангаргаа өргөсөн билээ. Энэ үеэр Монгол Улсын Ерөнхийлөгч Х.Баттулга "Ж.Эрдэнэбат аа, хууль шүүхийнхээ асуудлыг шийдчихээд нэг мөр орж ирж, тангаргаа өргөж болдоггүй юм уу.Тэр зэргийн ёс зүй байх ёстой бус уу" хэмээн хэдэнтээ шахаж, шаардсан ч тэрбээр хүлээн аваагүй юм. 

Харин өдгөө тэрбээр УИХ-ын гишүүний тангаргаа өргөсөн ч яллагдагчаар хэвээр байгааг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх өчигдөр зарлачихлаа. Тодруулбал, Нийслэлийн Прокурорын газраас 2021 оны тавдугаар сарын 11-ний өдөр яллагдагч Ж.Эрдэнэбат, Б.Отгонбаатар, Д.Ганбат, М.Мандахбаяр, Д.Түвшинжаргал нарт “Хязгаарлалт тогтоолгох тухай” саналыг Сүхбаатар дүүргийн Эрүүгийн хэргийн анхан шатны шүүхэд гаргасан бөгөөд тус Прокурорын газраас 2021 оны тавдугаар сарын 12-ны өдрийн 1/3047 дугаартай албан тоотоор яллагдагч Ж.Эрдэнэбатад Хязгаарлалт тогтоолгох, таслан сэргийлэх арга хэмжээ авахуулах тухай саналаасаа татгалзсан байна.  Нэг үгээр бол, Ж.Эрдэнэбатад хилийг хориг тавихаас прокурор нь татгалзсан байдаг.

Ийм жишиг Монголд л байдаг байх. Хууль шүүхийн байгууллага нь Ж.Эрдэнэбатыг яллагдагчаар нь цоллоод зарлаад байдаг. Гэтэл тэрбээр УИХ-ын гишүүний тангаргаа өргөчихсөн, сэлэнгэчүүдийн албан ёсны төлөөлөл болсон байдаг.

Үүнээс харахад Ж.Эрдэнэбат нь УИХ-ын гишүүн үү, эсвэл яллагдагч уу гэдэг эргэлзээг өөрийн эрхгүй төрүүлж байна. Хуулийн энэ гажуудлыг засч, залруулж, асуудлыг нэг тийш шийдэхгүй бол яллагдагч УИХ-ын гишүүн гэж байж боломгүй санагдана. 

У.Тэргэл