УИХ-ын өнөөдрийн чуулганаар Нийгмийн даатгалын тухай хуульд өөрчлөлт оруулах тухай хуулийн төслийг хэлэлцэж байна. Энэ үеэр гишүүд ажлын хэсгийнхнээс асуулт асууж, хариулт авлаа. 

Ж.Сүхбаатар: Гишүүдийн санаачилгаар НДШ-ийн хувь хэмжээг бууруулж байгаа юм уу, эсвэл түр хойшлуулж байгаа юм уу. Аль нь юм. Хоёрдугаарт, Нийгмийн даатгалын ерөнхий газрын дарга гэж ямар нөхөр байдаг юм. Ажил муутай газар юм биш үү.

Хоёрдугаарт, Их Хурлын гишүүд шимтгэл бууруулах гээд хуулийн төсөл санаачиллаа. Гэхдээ иргэд шахалт үзүүлэх юм бол ингээд бууруулчихаж болдог юм байна. Дахиад бууруулах боломжтэй юм биш үү гэж. Хамгийн гол нь тухайн санхүүжилтийг нь хаанаас гаргах юм.

Үндэслэл тооцооллыг нь сайн хэлэхгүй бол дараагийн удаа энэ асуудал үргэлжлээд явахаар байна.

Зарим иргэд хулгайлагдсан, алдагдсан мөнгөө олж аваад санхүүжүүл гээд байгаа. Нэг талаас зөв шаардлага. Нийгмийн даатгалын ерөнхий газарт хамгийн сүүлд хэзээ шалгалт оруулсан бэ. Хулгай нүүрлэсэн газар гэж яриад байдаг шүү. Нийгмийн даатгалын байгууллага ажлаа хийхгүй байна.

Ажлын хэсэг: таны хэлснээр сургалт, судалгааг эрчимжүүлж ажиллая. Бид цар тахлын үед онлайн сургалтуудыг зарим байгууллагуудтай хамтарч хийж байгаа.

ХНХ-ын сайд А.Ариунзаяа: Хоёр хувийн нэмэгдлийн хувьд 2017 онд УИХ-аар батлагдсан хуулийн дагуу 2020 оны нэгдүгээр сараас хэрэгжих байсныг энэ жилээс хэрэгжиж эхлэхээр хойшлуулсан. Ингэхдээ хувийн хэвшлийнхэн долоодугаар сарын 1-ээс, төрийн байгууллагынхан хэвийн төлөөд явж байна. Гишүүдийн зүгээс хоёр хувийн нэмэгдлийг болиулах хуулийн төсөл санаачилсан. Цаашид зөвхөн хувь хэмжээ биш тогтолцоон дээр төвлөрч ажиллах ёстой гэдэг байр суурьт нэгдэж Нийгмийн даатгалынхаа багц хуулийн төслийг ирэх долоо хоногоос танилцуулаад явна.

Б.Лхам