Элсэлтийн ерөнхий бүртгэл, ерөнхий боловсролын сургуулийн 12 дугаар ангийн сурагчдын дархлаажуулалт, танхимын давтлагын асуудлаар БШУЯ-наас мэдээлэл өглөө. Энэ үеэр Боловсрол, шинжлэх ухааны сайд Л.Энх-Амгалан "Ерөнхий боловсролын сургуулийн сурагчид анги дэвших, улсынх, элсэлтийн гэсэн гурван шалгалт өгдөг. Гэхдээ “Ковид19”-ийн улмаас хичээлийн хоцрогдол үүссэн учраас анги дэвшүүлэх болон улсын шалгалтыг авахгүй байхаар шийдвэрлэсэн.

Мөн Засгийн газрын өчигдрийн хуралдаанаас 12 дугаар анги төгсөгчдөөс монгол хэл, бичгийн шалгалт авахгүй байхаар шийдвэрлэсэн нь маш том дэмжлэг юм. Түүнчлэн энэ сарын 17-ноос элсэлтийн ерөнхий шалгалтад бэлтгэх нэг сарын хугацаатай танхимын давтлагад хамруулахаар болсон. Тэгээд ч цаашдаа элсэлтийн ерөнхий шалгалтыг жилд хоёр удаа авдаг байхаар төлөвлөж байна. Энэ нь том боломж юм.

Элсэлтийн ерөнхий шалгалтад орох сурагчид вакцинжуулалтад хамрагдах боломжтой

Энэ жил 40420 шалгуулагч элсэлтийн ерөнхий шалгалт өгнө. Тэдгээрийн 13636 нь 19, 25082 нь 18 настай. Тэд вакцинд хамрагдах боломжтой гэдгийг БШУ-ны сайд хэллээ. Мөн бусад төгсөгчдийг вакцинд хамруулах боломжийг Улсын Онцгой комисс, Засгийн газартай зөвшилцөн шийдэх юм байна.

Л.Ганбат: ЭЕШ-ыг улсын хэмжээнд нэгдсэн байдлаар долоодугаар сарын 1-4-нд зохион байгуулна

Төгсөх ангийн сурагчдад танхимаар давтлага өгөх зааврын талаар Боловсролын үнэлгээний төвийн захирал Л.Ганбат "Элсэлтийн ерөнхий шалгалтыг улсын хэмжээнд нэгдсэн байдлаар долоодугаар сарын 1-4-ны хооронд зохион байгуулна. Өмнөх онд төгссөн болон ахин их, дээд сургуульд элсэхээр шалгалт өгч байгаа сурагчдын тоо энэ жил хоёр дахин өссөн. Тодруулбал, өмнөх жилүүдэд 3000 орчим хүүхэд байсан бол энэ жил 8000 гаруй шалгуулагч бүртгүүлсэн. Шалгуулагчийн суудлын хуваарийг тавдугаар сарын 20-ноос хойш зарлана. Энэ жил элсэлтийн ерөнхий шалгалтыг улсын хэмжээнд 50 байранд авна. Шалгалтын байранд тусгай анги бэлтгэнэ. Тухайн ангид халуурсан, халдварын шинж тэмдэг илэрсэн сурагчдаас шалгалт авах юм. Элсэлтийн ерөнхий шалгалтын зохион байгуулалтын ажилд 3650 орчим багш оролцох ба дүнг мэдээлэл, технологийн шийдлийг ашиглаж гаргана. Улмаар шалгуулагчид шалгалт өгснөөс хойш 20 минутын дотор авсан оноог нь зарлах юм" гэв.

Т.Ням-Очир: Багш нарын 80 хувь нь дархлаажуулалтдаа бүрэн хамрагдсан

БШУЯ-ны Бага, дунд боловсролын газрын дарга Т.Ням-Очир "Сургуулиудад нягтрал, ачааллыг багасгахын тулд төгсөгчдөд элсэлтийн шалгалт өгөх хичээлээр нь өдөрт гурваас илүүгүй цагаар давтлага зохион байгуулах түр зааврыг баталсан. Үүний тулд бүх багш нар дархлаажуулалтад бүрэн хамрагдсан байх учиртай. Өнөөдрийн байдлаар багш нарын 80 хувь нь вакциндаа хамрагдаад байна" гэлээ. 

У.Тэргэл