Эрүүл мэндийн яам ийм үүрэг, чиглэлийг Нийслэлийн эрүүл мэндийн газарт өгчээ. Тодруулбал, коронавирусийг илрүүлэх сайн дурын шинжилгээг зургаадугаар сарын 15-наас төлбөртэй болгох чиглэл өгч, судлахыг үүрэгджээ. Энэ талаар Нийслэлийн эрүүл мэндийн газрын орлогч дарга Н.Зэндмаа  “Эрүүл мэндийн яамнаас энэ талаар судлахыг бидэнд даалгасан.

Зургаадугаар сарын 15-наас эхлэн сайн дурын шинжилгээнүүд төлбөртэй болно. Харин тандалтын болон хавьтлын шинжилгээг үнэ төлбөргүй авна. Магадгүй шинжилгээг төлбөртэй болгоход дүүрэг бүр зохион байгуулалтаа хийж, цэгээ нэмэгдүүлэхийг үгүйсгэхгүй” гэжээ.

Өнөөдрийн байдлаар нийслэлийн зургаан дүүрэгт коронавирусний халдвартай эсэхийг илрүүлэх шинжилгээний зургаан цэг ажиллаж байгаа. Энэхүү цэгүүдэд  PCR бус түргэвчилсэн оношлуураар шинжилгээг хийж, хариуг 30 минутын дотор гаргаж байгаа билээ. Энэхүү сайн дурын шинжилгээг үнэ төлбөргүй авч байгаа ч цаг нь богино, өгөх иргэдийн тоо олон  байгаа нь шүүмжлэл дагуулаад байгаа.

Тухайлбал, тодорхой цэгт шинжилгээ авч байгаа нэртэй ч 09.00-12.00 цагийн хооронд  бужигнаад өнгөрч байна. Вакцины эхний тундаа хамрагдсан, эрүүл мэндийн байдлаас шалтгаалж вакцинаа хийлгээгүй иргэд орон нутаг руу хувь, хувьсгалын ажлаар явахаар болбол сайн дурын шинжилгээг зайлшгүй өгч байгаа. Ийм иргэн ч олон аж. Тэд 02 цагаас эхлэн дугаарлан байж  шинжилгээ өгч байгаа гэнэ.

Харин зургаадугаар сарын 15-наас сайн дурын  шинжилгээг төлбөртэй болгосноор ямар ач холбогдолтой вэ. Мэдээж, иргэдийн нуруун дээр давхар ачаалал ирнэ. Ялангуяа орон нутагт эко бүс гэж байхгүй болсон. Бүх аймаг, сумдад халдвар тархаж, өдрөөс өдөрт нэмэгдсээр буй. Тиймээс дотооддоо арга хэмжээ авч, гаднаас ирж буй иргэнээс шинжилгээний бичиг нэхэх нь зүйн хэрэг болно. 

Бусад улс орон оношлуур бүтээж, эмийн сандаа, гудамжинд ч үнэгүй тавьж, дурын иргэн хаа дуртай газраа өөрийгөө халдвартай эсэхийг тандчихаж байна. Гэтэл манай улс эсрэгээрээ нөгөө л улиг болсон зангаараа иргэдийнхээ халаасыг тэмтрэх энэ арга руу л  орж байна. Одоогийн байдлаар, сайн дурын шинжилгээг ямар үнээр авахыг эцэслэн тогтоогоогүй байгаа ч урьдчилсан байдлаар, 30 мянган төгрөг гэсэн тоо явааг зарим эх сурвалж хэлж байна.

У.Тэргэл