Дархлаа судлаач, хүний их эмч, доктор Д.Мандахнаран ээлжит мэдээллээ өглөө.  Тэрбээр "Вакцинжуулалт хийж байгаа улс орнууд тэр дундаа хөгжингүй улсад дархлаажуулалтад хамрагдсан насны бүлгийнхний өвчлөл, хүндрэл, нас баралт буурч байна. Гэтэл вакцинжуулаагүй хэсэг буюу хүүхдээр дамжин халдварлах, тархах нөхцөл байдал үүсэж эхэлсэн.

Коронавирусний вакцинуудыг богино хугацаанд бүтээсэн учраас олон орон болгоомжилж байсан ч зарим улс тухайлбал, Израйл Pfizer вакцин насанд хүрэгчдэд 95 хувьтай дархлаа тогтоож байсан учир хүүхдүүддээ хийгээд эхэлсэн. АНУ-ын Өвчний хяналт сэргийлэлтийн төв 2000 орчим хүүхдийг хамруулан,  12-15 насны 1005 хүүхдэд Pfizer вакцин хийгээд, 978 хүүхдэд вакцин хийлгүйгээр хэсэг хугацаанд ажигласан байна.

Ингэхэд вакцин хийлгэсэн хүүхдүүдээс халдвар авсан тохиолдол огт гараагүй бол хийлгээгүй хүүхдүүдээс 16 нь халдвар авчээ. Үүнд үндэслээд 12-15 насныхныг коронавирусний халдвараас 100 хувь сэргийлж байна гэж дүгнээд энэ насны хүүхдүүдийг сайн дурын үндсэн дээр вакцинжуулах зөвлөмж гаргасан. Pfizer вакциныг олон улс оронд хэрэглэж, судалгааны дүн гарсаар байна. Үр дүнг харвал насанд хүрэгчдэд 95 хувь, хүүхдүүдэд 100 хувийн дархлаа тогтоож байгаа. Ингэхдээ насанд хүрэгчид болон хүүхдэд илрэх гаж нөлөө ижил байна. 16 болон түүнээс дээш насныханд маш цөөн тохиолдолд зүрхний үрэвсэлт өвчин илэрсэн” гэлээ.

У.Тэргэл