Монгол Улсын Ерөнхийлөгчийн сонгууль дууслаа. Амьдрал үргэлжилдгээрээ үргэлжилнэ. Бидний өмнө өргөн хэрэглээний бараа бүтээгдэхүүний үнийн өсөлт, хэд хоногийн борооны ая даахгүй бүтээн байгуулалтын асуудал, ковид гээд олон асуудал байна. 

Гишүүд нь сонгууль гээд тойрог руугаа хэсээд явсан. Ерөнхийлөгч шагнал тарааж, олныг бужигнуулсан. Нэр дэвшигчид сурталчилгаа гээд баахан хүн дагуулаад орон нутгаар тэнэсэн. Энэ бүхний үр дүнд орон нутагт өдөрт бүртгэгдэх халдварын тоо 500 давж, нийслэлийнх 1000 гараад байна. Халдварын тоо дээд цэгтээ хүрлээ. Коронавируст халдвараар нас барах иргэдийн тоо өдөрт 10 гардаг боллоо. Ойролцоогоор таван хүн тутмын нэг нь халдвартай, 10 мянгад нэг хүн нас барж байна гэсэн үг юм.

Монголд халдварлах чадвар өндөр коронавирусний шинэ хувилбар тархаж байж магадгүй талаар Япон руу явсан шинжилгээний хариунаас гарсан.

Энэ бол аюул. Иргэдээ хорьж хорьчихоод өөрсдөө сонгууль гэж хөөрцөглөж задгайрсны чинь гор одоо гарч байна. Улс төр  чинь дууссан уу, дарга нар аа. Ерөнхий сайд зургаадугаар сарын 15-ныг гэхэд коронавирусний тархалт намжиж, үр дүн гарч эхэлнэ гэж хэлсэн. Энэ байдлаар юуны үр дүн манатай л болох нь.  Нар буцахад 10-хан хоног үлдлээ. Ковид-гүй зун болно гэсэн итгэл үлдсэн үү.

Б.Лхам