Монгол Улсын Ерөнхийлөгчийн сонгууль амжилттай болж өнгөрлөө. Сонгуулийн сурталчилгааны хугацаанд нэгнийгээ харлуулж, яс үндэс, удам угсаагаар нь дайрч доромжилж, элдэв төрлийн дүрс болон дуу бичлэг цацсангүй. Нэг үгээр хэлбэл, өмнөх сонгуулиудын хар бараан түүх давтагдсангүй. Браво. Харин сонгуулийн дараа тахимаа өгдөггүй, бусдыгаа хүлээн зөвшөөрч чаддаггүй улстөрчдийн дүр зураг давтагдав. Ерөнхийлөгчийн сонгуулийн үр дүнг улс төрийн намууд хэрхэн дүгнэснийг тоймлон хүргэж байна.

У.Хүрэлсүх: Зардал багатай, зөв шударга сонгууль боллоо

Сонгуулийн дүн урьдчилсан байдлаар гарч, МАН үнэмлэхүй ялалт байгуулсан. Тэд баяртай байна. Монгол Улсын зургаа дахь Ерөнхийлөгчөөр сонгогдсон У.Хүрэлсүх “Намайг дэмжиж, хариуцлага үүрүүлж байгаа иргэддээ баярлалаа. Эхлүүлсэн ажлаа үргэлжлүүлэх итгэл гэж бодож байна. Ард иргэдийнхээ итгэлийг чөмгөө дундартал зүтгэж, хариулах болно. Хамт нэр дэвшсэн С.Эрдэнэ, Д.Энхбат нарт баярлалаа. Цаашдын улс төрийн замналд нь амжилт хүсье. Зардал багатай, зөв шударга сонгууль боллоо. Ард түмэндээ баярлалаа. Монгол Улсын төлөө зүтгэе” хэмээсэн.

Ч.Өнөрбаяр: Энэ удаагийн сонгуулийг бид шударга сонгууль гэж бодохгүй байна

Унасан бөхөд шалтаг мундахгүй гэгчээр өвдөг шороодож, олонхын санал авч чадаагүй намууд ээлж дараалан мэдээлэл хийж, улиас унагав.

Ардчилсан  намын нарийн бичгийн дарга Ч.Өнөрбаяр "Ардчилсан сонгууль бол улс төрийн намуудын үнэт зүйл зарчимд тулгуурлан тэгш шударга зарчмаар өрнөдөг. Гэтэл ийм байхаа больжээ. Ер нь 2020, 2021 оны сонгуулийг харахад МАН-ын сонгуулийн үр дүнг бусад нам хууль ёсны мэт харагдуулдаг байдал бий болжээ. Тиймээс энэ удаагийн сонгуулийг бид шударга сонгууль гэж бодохгүй байна. Бидний ялагдал их хувьсгалын түүх болдог туршлага бий. Цаашид бид ардчиллын төлөөх намуудтай нэгдэх ёстой юм байна. Тэгэхгүй бол МАН ба бусад гэсэн байдал бий болжээ. Үүнтэй бид тэмцэнэ. Ардчилсан намын шинэчлэл үргэлжилнэ. Бид иргэд сонгогчийн итгэл үнэмшлийг хүлээдэг тэр байдал руугаа явах цаг болжээ" гэсэн юм.

С.Эрдэнэ: Бид асар их луйврын хар хүчний эсрэг хүчин мөхөсдсөн

Монгол Улсын Ерөнхийлөгчийн сонгуульд Ардчилсан намаас нэр дэвшин өрсөлдсөн С.Эрдэнэ цахим хаягаараа дамжуулж "Ардчиллын туг сүлд нь болж, тусгаар Монгол Улсынхаа баталгаа болсон АН-ын үнэнч шударга гишүүддээ баярласан талархсанаа илэрхийлье. Та бид асар их луйврын хар хүчний эсрэг хүчин мөхөсдсөн ч үзэл санаандаа үнэнч үлдэж чадсандаа бахархах ёстой! Та нар маань ардчиллын баатрууд шүү" хэмээн мэдэгдсэн байна.

О.Цогтгэрэл: Энэ удаагийнх хятад маягийн сонгууль боллоо

УИХ-д суудалтай Ардчилсан намынхан 2021 оны Ерөнхийлөгчийн сонгуульд нэр дэвшигчээ бүртгүүлэхээр СЕХ-нд хандсан ч тусыг эс олсон. Улмаар Төв талбай дээр өлсгөлөн хүртэл зарлаад нэмэр болоогүй. Тэгвэл сонгуулийн дараа ч тэд мөн мэдээлэл хийж, энэ удаагийн сонгуулийг хятад маягийн сонгууль боллоо гэдгийг мэдэгдэв. Энэ талаар Ардчилсан намын дарга, УИХ-ын гишүүн О.Цогтгэрэл “Монгол Улсын найм дахь удаагийн Ерөнхийлөгчийн сонгууль болж өнгөрлөө. Үүнтэй холбогдуулан албан ёсны Ардчилсан намын байр суурийг илэрхийлж байна. Сонгуулийн дүнгээс харахад МАН-аас нэр дэвшигч үнэмлэхүй ялалт байгуулсан байна.

Харин АН-аас нэр дэвшигч энэ сонгуульд түүхэн доод буюу 5-6 хувийн санал авсан нь бид бүгдэд амаргүй байна. Бид ардчилалд хайртай Монголын ард түмэн, АН-ын гишүүд, дэмжигчдээсээ уучлал хүсэх ёстой. Албан ёсны нэр дэвшигчээ тодруулж, нэр төртэйгөөр энэ сонгуульд оролцох боломж бидэнд байсангүй. Гишүүд, дэмжигчдээс бус дээр байгаа бид бүгдийн үл ойлголцлоос болж ийм нөхцөл байдалд хүрсэн. Дараагийн нөхөн сонгуулийн өмнө энэ бүхэнд дүгнэлт хийх ёстой.

Ерөнхийдөө энэ удаагийн сонгуулийг дүгнээд хэлэхэд хятад маягийн сонгууль руу орчихлоо. Өөрөөр хэлбэл, бүхэл бүтэн төрийн аппараттай бусад нам өрсөлддөг болж байна. Ийм зам руу Монгол Улсыг хөтөлж байгаа нь харамсалтай. Захиалгаар АН-аас дэвшсэн нэр дэвшигч болон түүний багийнхан хариуцлага хүлээх ёстой. Бид бүхэн энэ сонгуулийн дараа урагшаа харж, олон ажил хийнэ. Удахгүй болох хоёр нөхөн сонгуульд одооноос бэлдэж ажиллах болно" гэв.

Д.Энхбат: Бид энэ сонгуульд гэрэл гэгээ, шинэ өнгө авчирч чадсан

Монгол Улсын Ерөнхийлөгчийн сонгуульд “Зөв хүн электорат эвсэл”-ээс нэр дэвшигч Д.Энхбат чамгүй амжилт үзүүлсэн. Энэхүү амжилтдаа ч сэтгэл хангалуун байгаа.

Энэ талаар Д.Энхбат өөрийн цахим хуудастаа “Сонгууль өндөрлөлөө. Манай баг, дэмжигчид маш сайн ажилласан. Бид энэ сонгуульд гэрэл гэгээ, шинэ өнгө авчирч чадсандаа баяртай байна. Сайн цаг өөрөө ирдэггүй, түүнийг авчирдаг гэдэгт итгэж бид зүтгэсэн. Монголчууд бидний сонголт мэргэн байж, улс орон минь мандан бадрах болтугай. Чин сэтгэлээсээ, хамтдаа зүтгэвэл ялалт бүрэн боломжтойг Монголын шинэ үеийнхэнд мэдрүүлсэн бол бидний зүтгэл үр дүнгээ өгсөн гэсэн үг. Хуучин нүсэр тогтолцоо, халамжийн сэтгэлгээ тийм ч хүчтэй бус, удахгүй солигдох болно. Өнөөдөр бид тэр зүгт нэг алхам хийлээ. Амжилт” хэмээн бичсэн.

Т.Доржханд: Өнгөрсөн 30 жилд байгаагүй онцлогтой сонгууль байлаа

Хөдөлмөрийн үндэсний намын дарга Т.Доржханд “Энэ удаагийн сонгууль өнгөрсөн 30 жилд байгаагүй онцлогтой байлаа. Тодруулбал, энэ хугацаанд өрсөлдөгчид биенээ харлуулах гүтгэх зүйл байсангүй. Мөн хамгийн бага зардлаар сонгуулиа хийлээ. Нийгмийн хүлээлтийг хүлээсэн МАН-ын дарга У.Хүрэлсүх танд баяр хүргэе. Монгол төрийн хүндтэй албыг зургаан жилд нэр төртэй хашна гэдэгт итгэлтэй байна. Бидэнтэй өрсөлдсөн С.Эрдэнэд талархал илэрхийлье. Өнөөдөр бидэнд саналаа өгсөн 246 мянган сонгогчдодоо баярлалаа. 2021 оны Ерөнхийлөгчийн сонгуулийн дүнгээс харахад биднийг дэмжигч нэмэгдсэн байна. Цаашдаа бидэнд гуравдагч хүчин болох боломж байгаа юм байна. Нэг сарын өмнө шийдвэрээ гаргаж байсан Д.Энхбат сонгуульд амжилттай оролцлоо. Нэр дэвшигчийн биеийн байдал нь сайн байгаа. Удахгүй эхнэртэйгээ эмнэлгээс гарах байх” гэсэн юм.

Б.Баатар