ОХУ-ын Ерөнхийлөгч В.Путин Монгол Улсын Ерөнхийлөгчийн сонгуульд ялалт байгуулсанд нь У.Хүрэлсүхэд баяр хүргэж, ил захидал илгээжээ. Захидалдаа “Таны улс төрийн нэр хүнд өндөр байгааг санал хураалтын дүн нотлон харуулав. Төрийн тэргүүний хувиар  таны хийх ажил Орос, Монголын иж бүрэн стратегийн түншлэлийн  харилцааг улам бэхжүүлэхэд хувь нэмэр болно гэж найдаж байна” гэжээ.

Мөн хөрш улс БНХАУ-ын Гадаад харилцааны яамны хэвлэлийн төлөөлөгч Ван Вэньбинь "Ноён У.Хүрэлсүх бол Хятадын ард түмэнд танил болсон Монголын улстөрч. Тэрбээр хоёр орны харилцааг хөгжүүлэхэд чухал хувь нэмэр оруулахын тулд Хятад, Монголын найрсаг харилцаа, хамтын ажиллагааг эртнээс тууштай дэмжиж ирсэн. Монгол Улсын Ерөнхийлөгчөөр сонгогдсонд нь Хятадын талаас баяр хүргэж байна” гэжээ. Цаашлаад  Хятад, Монгол бол найрсаг хөршүүд. Сүүлийн жилүүдэд хоёр талын харилцаа хөгжлийн эрч хүчээ хадгалсаар ирсэн. “COVID-19” цар тахал дэгдсэнээс хойш хоёр тал цар тахалтай тэмцэхэд харилцан хүчин чармайлт гаргаж, эерэг үр дүнд хүрсэн. Бид Хятад, Монголын иж бүрэн стратегийн түншлэлийн харилцааг шинэ шатанд гарган илүү хөгжүүлэх чиглэлээр Монгол Улстай үргэлжлүүлэн ажиллахад бэлэн байна" гэв.

У.Тэргэл