НҮБ-аас дэлхийн улс орнуудад халдвар дотооддоо алдсан даруйд хөнгөн ялтай хоригдлуудыг суллах, ялыг нь өөрчлөх, шүүхээс аль болох хорих ял оноохгүй байх зөвлөмжийг хүргүүлсэн. Гэтэл манай хорих ангиудад коронавирусний халдвар гуравдугаар сараас эрчимтэй тархаж, тавдугаар сар гэхэд 400 гаруй хүн халдвар авч, заримыг нь эмнэлэгт, заримыг нь боломжоороо тусгаарласан талаар ШШГЕГ-ынхан хэлж байсан. Хорих ангийн эмнэлгүүд ачааллаа дийлэхгүй болж, халдвартай хоригдлуудыг хэдийгээр тусгаарлаж байгаа ч битүү орчин учраас халдварыг улам нэмж байгаа талаар ХЭҮК-ийн гишүүн Ж.Хунан газар дээр нь ажиллаж ирээд мэдэгдэж байв. Мөн шуурхай арга хэмжээ авахгүй бол, хүмүүсийг цөөлөхгүй бол нөхцөл байдал цаашид ихээхэн эрсдэл дагуулахыг ч анхааруулж байсан билээ.

Хууль зүй, дотоод хэргийн сайд Х.Нямбаатар харин энэ талаар өмнө, өдгөө нэг үг ч унагасангүй. Цагдан хоригдож буй хүмүүс олноороо өвчилж байхад тэрбээр тэс хөндлөн зүйл яриад гүйж явсан нөхөр. Өнгөрсөн тавдугаар сараас хойш хорих ангиудад нөхцөл байдал ямар байгаа талаарх сураг чимээ, мэдээлэл өнөөдрийн байдлаар алга байна.

Улс даяараа халдварын тоо огцом нэмэгдэж, олон хүн нас барж байхад битүү хаагдмал, орон байрны нөхцөл муу, хязгаарлагдмал орчинд халдвар тархахгүй, хүн өвчлөхгүй байна гэвэл түүн шиг худлаа зүйл үгүй. Хорих ангиудад буй хоригдлууд, урьдчилан хорих байранд түр саатуулаад байгаа хүмүүст эргэлт оруулахаа болиод удаж байгаа. Нөхцөл байдал ямар байгаад сэтгэл зовниж байна гэх олон хүн ШШГЕГ-т ханддаг ч тоймтой хариу авч чадахгүй байгаагаа хэлж байна.

Төр, засаг нь ч үүнд анхаарах сөхөө алга. Ялтан, хоригдол бүү хэл жирийн иргэдийнхээ өвчлөлийг ч хумьж чадахаа байсан. Угтаа бол Ардын хувьсгалын түүхт 100 жилийн ой тохионо. Түүхт ойгоор хоригдол, ялтнуудад өршөөл үзүүлдэг жишгийн дагуу хөнгөн ялтай, анх удаа гэмт хэрэг үйлдсэн, 60-аас дээш насны хоригдлуудыг ялаас чөлөөлөх, суллах тухай асуудлыг судалж эхэлсэн хэмээгээд таг чиг болсон.

Харин өдгөө юун Өршөөлийн хууль шинэ Ерөнхийлөгчөө тангараг өргүүлэхэд хамаг анхаарлаа хандуулж, Ардын хувьсгалын түүхт ойн одон медаль тарааж, тусгайлан дуу зохиож, лого бүтээж, сүрт жагсаал хийхээр хөөрцөглөж байна. Алдаж, эндсэн ч ялтан, хоригдлууд Монгол Улсын иргэн. Тэдэнд ч амьд явах, эрүүл аюулгүй орчинд амьдрах Үндсэн хуулиар олгосон эрх бий гэдгийг сануулъя.

У.Тэргэл