Сүүлийн өдрүүдэд коронавирусний эсрэг эм, тарилгын эмийн худалдан авалтын үйл ажиллагаатай холбоотой мэдээллүүд гарч, Арбидол эмийг 3-4 дахин өндөр үнээр худалдаалж буй талаар олон нийт цахим сүлжээнд шүүмжлэх болсон. Үүгээр ч зогсохгүй энэ асуудал өндрийг авч, Эрүүл мэнд сайд С.Энхболд хүртэл нэр холбогдоод амжсан билээ. 

Тухайн үед ЭМЯ-ны Төрийн нарийн бичгийн дарга Ч.Эрдэмбилэг “ЭМЯ-ны Эмийн зөвлөл хуралдсан. Эхний ээлжид тэдгээр ААН-үүд нэг удаагийн импортын лицензээр оруулж ирэхдээ мэдүүлсэн мэдүүлгийг олон нийтэд нээлттэй болгоно. Өөрөөр хэлбэл, ямар эмийг хэдэн төгрөгөөр борлуулахаар зөвшөөрөл авсныг өөрсдийн албан ёсны хуудсаараа дамжуулан мэдээлнэ” гэх хээвнэг хариултыг өгч байсан. Гэвч үнэнийг хэлж дөнгөөгүй өнөөдрийг хүрсэн билээ.

Тэгвэл коронавирусний эсрэг эм, тарилгын эмийн худалдан авалтын үйл ажиллагаанд Үндэсний аудитын газар шалгалт хийж, үнэнийг илчлэв. 

Тодруулбал, "ЭМЯ болон Эм, эмнэлгийн хэрэгслийн хяналт, зохицуулалтын газрын 2021 оны вирусийн эсрэг эмийн худалдан авалтад бодит цагийн аудит хийжээ. 2021 оны эхний хагас жилийн байдлаар Эрүүл мэндийн сайдын А/240, А/276, А/352 дугаартай 3 удаагийн тушаалаар вирусийн эсрэг Умифеновир (худалдааны нэршил нь Афлюдол, Арбидол, Арбивир), Фавипиравир эм болон Ремдесивир тарилгын эмийг гаднын үйлдвэрлэгч орнуудаас оруулж ирэх нэг удаагийн импортын лицензийг давхардсан тоогоор нийт 15 компанид олгосон байна.

Эрүүл мэндийн яамнаас энэ оны дөрөв тавдугаар сард ГУРВАН эм ханган нийлүүлэх байгууллагаас нийт 1,124,204,800.00 төгрөгөөр Умифеновир /Арбидол/ 200мл, 100мл вирусийн эсрэг эмийг 931,176 ширхэг, хоёр байгууллагаас 449,595,520.00 төгрөгөөр 4000 ширхэг Ремдесивир тарилгын эмийг ГЭРЭЭГ ШУУД БАЙГУУЛАХ аргаар худалдан авах гэрээ байгуулж 759,133,600.00 төгрөг олгосон байна.

Аудитын дүгнэлтээр зах зээл дээр эмийн сангуудаар худалдаалагдаж буй 100 мл Арбидол эмийг Эрүүл мэндийн яаманд нийлүүлсэн үнээс 43 орчим хувиар,  200 мл Арбидол эмийг 46 орчим хувиар өндөр үнэтэй борлуулж байна" гэж дүгнэжээ. 

Мөн Эрүүл мэндийн яам нь 2021 онд Коронавируст халдварын эмчилгээнд хэрэглэх эм /Умифеновир, Фавипиравир болон Ремдесивир/-ийн таван удаагийн худалдан авалтын буюу 899,254,800.00 төгрөгийн мэдээллийг Шилэн дансанд ил тод мэдээлээгүй байна.

Түүнчлэн, таван сая төгрөгөөс дээш үнийн дүн бүхий худалдан авалтын нийт 759,133,600.00 төгрөгийн дөрвөн гүйлгээний мэдээллийг Шилэн дансны нэгдсэн цахим хуудаст мэдээлээгүй байжээ.

Ийнхүү С.Энхболд сайдын толгойлсон Эрүүл мэндийн салбар аудитын байгууллагын шалгалтад бүдэрч, үнэн илчлэгдэв. 

Б.Баатар