Шүүхийн ерөнхий зөвлөлийн санал болгосноор Нийслэлийн Эрүүгийн хэргийн давж заалдах шатны шүүхийн шүүгч С.Соёмбо-Эрдэнийг Улсын Дээд шүүхийн шүүгчээр томилохыг УИХ-ын гишүүдийн олонхи 2018 оны арваннэгдүгээр сарын 15-нд дэмжсэн байдаг юм. УИХ-ын гишүүдийн олонхийн дэмжлэгийг ийн авсан ч Ерөнхийлөгчийн зарлиг гаралгүй хоёр жил гаран болсон.

Эцэст нь энэ оны хоёрдугаар сарын 18-нд л Ерөнхийлөгч зарлиг гарган С.Соёмбо-Эрдэнийг Улсын дээд шүүхийн шүүгчээр томилсон. Хоёр жил гарны дараа ингэж гэнэт зарлиг гаргасны цаад сэжмүүд энэ өдрүүдэд ил болж байх шиг байна. “Орцны” хэмээх өмгөөлөгч Д.Баасанцогтын бас нэгэн баримт Улсын дээд шүүхийн шүүгч С.Соёмбо-Эрдэнэтэй холбогдож байгаа юм.

Түүнийг Улсын Дээд шүүхийн шүүгчээр томилох зарлиг гарахаас ердөө хэдхэн хоногийн өмнө буюу 2021 оны хоёрдугаар сарын 9-ний орой “Баянгол” зочид буудалд нэгэн уулзалт болжээ. Энэ өдрийн 19 цагийн үед harrier маркийн автомашинаар өмгөөлөгч Д.Баасанцогтын гэрийн гадаа очсон С.Соёмбо-Эрдэнэ, Д.Баасанцогтын хамт түүний BMW автомашинаар “Баянгол” зочид буудал руу ирсэн. Дараахан нь Ерөнхийлөгч Х.Баттулга тус буудалд ирсэн байдаг юм. Энэ уулзалтын дараа буюу 2021 оны хоёрдугаар сарын 18-нд хоёр жил гаруй хав дарагдсан байсан С.Соёмбо-Эрдэнийг Улсын Дээд шүүхийн шүүгчээр томилсон Ерөнхийлөгчийн зарлиг гарсан. Үүнээс харахад Д.Баасанцогтоор зуучлуулсан уулзалт нь С.Соёмбо-Эрдэнийг Дээд шүүхийн шүүгчээр томилох тохироо байсан гэдэг нь харагдаж байгаа юм.

С.Сүлд