Хуулиараа бол Монголбанк УИХ-ын харьяа байгууллага. Төв банкны удирдлагуудыг УИХ томилж, Төв банк эргээд УИХ-д ажлаа тайлагнадаг гэсэн үг л дээ. Гэтэл энэ эрэмбэ эдүгээ алдагдаад байна. Тодруулбал, Төв банкны тэргүүн дэд ерөнхийлөгчөөр ажиллаж байсан, одоогийн Сангийн сайд Б.Жавхлангийн үеэс энэ эрэмбэ ингэж алдагдаад байгаа юм.

Одоогийн Монголбанкны тэргүүн дэд ерөнхийлөгч Г.Дөлгөөн бол улс төрийн дэмжлэг талаасаа яах аргагүй Сангийн сайд Б.Жавхлангийн хүн. Түүнийг Төрийн банкны Гүйцэтгэх захирлаар томилогдоход ч, Монголбанкны тэргүүн дэд ерөнхийлөгч болон дэвшихэд ч Б.Жавхлан сайдын нөлөө их байсан.

Үүний хариу юу, юу юм бүү мэд Монголбанкны тэргүүн дэд ерөнхийлөгч Г.Дөлгөөн УИХ-ын харьяа байгууллагын гэхээсээ илүү Засгийн газрын тэр тусмаа Сангийн яамны “ажилтан” шиг л ажилладаг болсон гэгддэг.

Гэхдээ ийм эрэмбэ ганц Монголбанк дээр алдагдаад байгаа юм биш. Харьяа байгууллагаа Сангийн яаманд “алдаад” байгаа УИХ-ын дарга Г.Занданшатар мөн л Засгийн газрын томилгоонд оролцоод эхэлжээ. Өнгөрсөн долоо хоногт  “Эрдэнэс силвер ресурс” ХХК-ийн Гүйцэтгэх захирлаар УИХ-ын даргын зөвлөхөөр ажиллаж байсан, Баянхонгор аймгийн уугуул С.Баярмөнхийг томилсон юм.

Уг нь “Эрдэнэс силвер ресурс” ХХК нь “Эрдэнэс Монгол” ХХК-ийн охин компани бөгөөд Засгийн газрын Хэрэг эрхлэх газрын даргын эрхлэх хүрээнд байдаг билээ.

С.Сүлд